Erlend frétt: Kirkjan og flóttafólkið frá Úkraínu

Flóttafólk frá Úkraínu í Berlín - mynd: Church Times

Fjölmargir söfnuðir þjóðkirkjunnar hafa haldið samtöðumessur fyrir Úkraínu og safnað fé fyrir flóttafólkið. Hjálparstarf kirkjunnar hefur sett af stað neyðarsöfnun. Samstarfshópur þjóðkirkjunnar um málefni flóttafólksins hefur verið skipaður en í honum eru þau sr. Toshiki Toma, sr. Ása Laufey Sæmundsdóttir og sr. Eva Björk Valdimarsdóttir. Þá hefur þjóðkirkjan lagt sitt af mörkum með rekstur á leikskóla fyrir börn flóttafólksins en hann er í húsnæði Hvítasunnukirkjunnar, Fíladelfíu.

Margir söfnuðir í Berlín hafa skotið skjólshúsi yfir úkraínska flóttamenn. Um 1500 flóttamenn dveljast í safnaðarheimilum, kirkjum og öðru húsnæði á vegum þeirra. Önnur safnaðarheimili hafa verið notuð sem dagsetur fyrir flóttafólkið og því boðið upp á margs konar afþreyingu og tilbreytingu.

Skipulagið er með þeim hætti að sjálfboðaliðar í nágrenninu koma til hjálpar, elda mat og sjá um börn og liðsinna konunum.

Fjöldi flóttamanna frá Úkraínu hefur streymt til Berlínar og þess vegna hefur verið gripið til þessa ráðs að kalla til sjálfboðaliða og kirkjuleg samtök.

Samtökin Caritas og Karmelítanunnur hafa til dæmis breytt gömlu umönnunarheimili í flóttamannabúðir sem taka 180 manns.

Þá er í bígerð að setja upp sálgæslumiðstöð þar sem flóttafólk og sjálfboðaliðar geta fengið aðstoð.

Berlín er aðeins í 80 km fjarlægð frá pólsku landamærunum og þar á milli eru góðar samgöngur. Meira en helmingur úkraínska flóttamanna hefur komið frá Póllandi til Þýskalands. Fyrir rúmri viku komu hvorki meira né minna en 10.000 flóttamenn og búist er við að þeim fjölgi.

Borgarstjóri Berlínar hefur látið þau orð falla að borgin verði senn ófær um að glíma við ástandið og hefur óskað eftir aðstoð frá sambandsfylkinu.

Á aðallestarstöð Berlínar hefur verið boðið upp á sálgæslu presta fyrir nýkomið flóttafólk.

Húsnæði á gamla Tegel-flugvellinum verður notað sem höfuðmiðstöð flóttafólksins.

Samkirkjulegar bænastundir fyrir fórnarlömbum stríðsins hafa verð haldnar og meðal annars í Dómkirkju mótmælenda í Berlín. Kaþólska kirkjan hefur einnig hafið söfnun til styrktar flóttafólki frá Úkraínu.

Chrismon/Church Times/hsh