Framtakssamur maður

Einar Aron Fjalarsson, framtakssamur ungur maður – mynd: hsh

Einar Aron Fjalarsson er ungur maður og nákunnugur kirkjulegu starfi á ýmsum sviðum. Hann ólst upp við kristilegt starf á Húsavík sem barn og síðar á Akureyri. Hann hefur verið framkvæmdastjóri Gídeonsfélagsins, og er að læra félagsráðgjöf, byrjar í haust í meistaranámi í þeirri grein. Samhliða námi og starfi hefur hann komið fram sem skemmtikraftur og þá einkum í ýmsum viðburðum sem eru við allra hæfi.
Hann er skapandi einstaklingur, fullur af eldmóði fyrir hönd trúarinnar og hrindir hlutum í verk sem hann segir að Guð leiði sig í og hann finnur að gagnast munu kirkju og kristilegu starfi.

Einar Aron kallar þetta biblíuteiknimyndasögur og þær koma fram í Sunnudagaskólanum: Biblíusögur fyrir börn, á YouTube.

„Þetta eru stutt myndbönd og þegar hafa átta þeirra birst en þau verða á þriðja tug alls og í vor verða þau öll komin út,“ segir hann. „Viðtökurnar hafa verið mjög góðar, margir hringt í mig og ýmsir stutt við bakið á mér því að allt kostar peninga.“

Myndböndin eru sett inn vikulega, alltaf á miðvikudögum. Lengd þeirra er misjöfn eða allt frá 90 sekúndum upp í þrjár til fjórar mínútur. Einar Aron talar sjálfur inn á myndböndin, hefur þægilega og skýra rödd.

„Þetta er hugsað fyrir yngri börnin,“ segir Einar Aron, „og foreldra þeirra til að horfa á með þeim og ræða efni þeirra.“

Hvað hefur þetta tekið langan tíma?

„Þetta er enn í vinnslu en ég hef undanfarin tvö ár unnið að þessu,“ segir hann, „fyrsta myndbandið var sent út á páskadag og þar sem páskarnir eru hápunktur í kristinni trú fannst mér viðeigandi að ýta verkinu úr vör á hátíðinni.“

Einar Aron segir að efnið sé ókeypis og öllum sé heimilt að nota það til dæmis í sunnudagaskólum eða annars staðar í kristilegu starfi eða á heimilum.

Það er ekki tilviljun að efnið sé aðgengilegt á YouTube þar sem það er annar stærsti leitarvefurinn á eftir Google.

Einar Aron sýnir og sannar að einstaklingsframtak í kirkjulegu starfi skilar sínu með markvissum, skjótum og vönduðum hætti.

hsh

(Skjáskot)