Orgelin hljóma

Orgel Dómkirkjunnar er eitt þeirra orgela sem hljóma í myndbandinu - mynd: hsh

Í nýju myndbandi sem Björn Steinar Sólbergsson, organisti í Hallgrímskirkju og skólastjóri Tónskóla þjóðkirkjunnar, hefur staðið að er áhorfendum boðið inn í allar kirkjur - alls níu - í Reykjavíkurprófastsdæmi vestra til að hlýða á ellefu orgelleikara flytja orgelverkið Was Gott tut, das ist wohlgetan, sálmalag og 9 tilbrigði eftir Johann Pachelbel. Þeir skipta verkinu á milli sín. Sálmalagið er nr. 214 í sálmabók kirkjunnar og heitir Gakk inn í Herrans helgidóm sem er yfirskrift myndbandsins. Það var sr. Valdimar Briem (1848-1930) sem þýddi sálminn.

Áhorfendur fá að kynnast orgelum kirknanna og organistunum sem leika jafnan á þau.

Björn Steinar segir að upprunalega hugmyndin komi frá Nils-Henrik Asheim sem er organisti tónlistarhússins í Stavanger í Noregi.

„Þorgrímur Þorsteinsson, tónmeistari, sá um upptökur og hljóðstjórn,“ segir Björn Steinar, „og gerir þetta listavel, vinna hans var hrífandi.“

Áhorfendum gefst ekki aðeins tækifæri til að hlusta á organista heldur og að svipast ögn um inni í kirkjunum sjálfum. Myndefnið allt er líka mjög vel heppnað. Myndbandið er tæpar tíu mínútur að lengd.

Upptökur fóru fram vorið 2022.