Nýja sálmabókin tekin formlega í notkun
![Nýja sálmabókin](/library/Images/Ny%cc%81ja%20sa%cc%81lmabo%cc%81kin.jpg?proc=NewsImage)
Stór dagur er í kirkjunni um allt land sunnudaginn 13. nóvember, en þá verður ný sálmabók formlega tekin í notkun.
Mikil vinna liggur að baki útgáfunni, en í sálmabókinni eru 795 sálmar og er mikil breidd í vali á sálmunum.
Í bókinni eru kjarnasálmar kirkjunnar ásamt nýjum sálmum sem margir hafa orðið til á síðustu árum.
Sálmarnir endurspegla fjölbreytt helgihald kirkjunnar við mismunandi aðstæður, lög sálmanna sýna afar fjölbreyttan tónlistarstíl.
Öll lögin eru hljómsett.
Sunnudaginn 13. nóvember næst komandi verður sálmabókin formlega tekin í notkun með bæn og blessun Biskups Íslands í útvarpsmessu í Dómkirkjunni í Reykjavík og hefst hún kl. 11:00 f.h.
Sr. Ragnar Gunnarsson framkvæmdastjóri Kristniboðssambandsins predikar í tilefni af árlegum kristniboðsdegi.
Fulltrúar úr sálmabókarnefndinni taka þátt í guðsþjónustunni og afhenda Biskupi Íslands fyrsta eintakið á formlegan hátt.
Sálmabókinni hefur verið dreift í kirkjur um allt land og taka guðsþjónustur dagsins víða mið af þessum tímamótum í kirkjunni.
slg