Fólkið í hverfinu tengist kirkjunni sterkum böndum

Sr. Alfreð Örn við kaffiborðið

Kirkjuafmæli eru ævinlega hátíðlegar stundir og nú á vordögum hafa verið haldin nokkur kirkjuafmæli á höfuðborgarsvæðinu.

Má þar nefna 35 ára afmæli bæði Breiðholtskirkju og Fella- og Hólakirkju.

Á páskadag hélt svo Hjallakirkja í Kópavogi upp á 30 ára afmæli sitt.

Var það gert við hátíðarmessu kl. 9:00 á páskadagsmorgunn.

Eftir messuna var morgunverður og afmæliskaka í boði.

Sóknarnefndin sá um veitingarnar og lagði á borð.


Sr. Alfreð Örn Finnson sóknarprestur í Digranes- og Hjallaprestakalli prédikaði og þjónaði fyrir altari.

Matthías V. Baldursson organisti lék á hljóðfærið, Áslaug Helga Hálfdánardóttir söng einsöng ásamt Vox Gospelkór Hjallakirkju.

Að sögn sr. Alfreðs var fínasta mæting og meðal annars kom fólk sem var í sóknarnefnd þegar kirkjan var vígð fyrir 30 árum.

„Það var góður andi og fín stund og frábært samfélag eftir messuna“

sagði hann.

Í prédikun sinni ryfjaði hann upp sögu kirkjunnar og sagði meðal annrs:

„ Hjallasókn var mynduð með skiptingu Digranessóknar.

Stofndagur var 25. maí 1987 á fundi í Digranesskóla.

Sr. Kristján Einar Þorvarðarson var valinn fyrsti prestur safnaðarins.

Safnaðarstarf hófst í Digranesskóla en messuheimili safnaðarins var vígt í skólanum hinn 10. janúar 1988.

Gert var ráð fyrir kirkju á lóðinni við Álfaheiði og fyrsta skóflastungan var tekin 19. maí 1991.

Kirkjan var síðan vígð á páskadag 11. apríl 1993.“

Og hann bætti við:


„Það er forvitnilegt að skoða myndir frá byggingu kirkjunnar, umhverfið er orðið ansi mikið gróið í samanburði við árið 1993.

Það er gaman að lesa um sögu sóknarinnar og hversu stórhuga fólk var.

Starfið hófst í skólabyggingu en mjög fljótlega farið að huga að byggingu kirkjunnar.

Það er ósanngjarnt að minnast á einstaka presta eða starfsfólk en gaman að minnast á að prófasturinn okkar sr. Bryndís Malla þjónaði Hjallasókn 95-96 og sr. Guðmundur Karl sóknarprestur í Lindakirkju þjónaði við Hjallakirkju þegar Lindasókn var stofnuð 2002 og færði sig þangað yfir.

Lindasókn og hverfið sem er vissulega orðið ansi stórt í dag tilheyrði því Hjallasókn fram til ársins 2002.

Kirkjunni okkar hefur verið vel haldið við, fólkið í hverfinu tengist kirkjunni sinni sterkum böndum og hér er öflugt starf og sóknarnefnd sem ber hag kirkjunnar sinnar og útbreiðslu góðu fréttanna fyrir brjósti.“

slg

Myndir með frétt