Bústaðakirkja er mikilvægur vettvangur hátíðahalda á sumardaginn fyrsta

Skólahljómsveit Austurbæjar fyrir utan Bústaðakirkju

Áralöng hefð er fyrir mikilli hátíð í Fossvoginum á sumardaginn fyrsta.

Gott samstarf er á milli stofnana og félagasamtaka sem taka þátt í skipulagningu dagskrárinnar.

Dagskráin á sumardaginn fyrsta hófst með grillveislu í Grímsbæ, þar sem sjálfboðaliðar frá Knattspyrnufélaginu Víkingi stóðu vaktina við grillið.

Krambúðin gaf veitingarnar og fjölskyldur og börn komu saman.

Frá Grímsbænum var haldið af stað í skrúðgöngu klukkan 12:00 þar sem Skátafélagið Garðbúar leiddi gönguna undir taktfastri tónlist frá Skólahljómsveit Austurbæjar.

Stjórnandi skólahljómsveitarinnar er Snorri Heimisson.

Fylkingin gekk yfir Bústaðaveginn, upp Tunguveginn í átt að Bústaðakirkju.

Þegar skrúðgangan var kominn á planið við Bústaðakirkju, lék Skólahljómsveitin nokkur lög undir stjórn Snorra Heimissonar.

Inni í kirkjunni söng Barnakór TónGraf og TónFoss þrjú lög undir stjórn Eddu Austmann og Auðar Guðjohnsen, við undirleik Ástu Haraldsdóttur kantors Grensáskirkju.

Séra Eva Björk Valdimarsdóttir prestur í Fossvogsprestakalli leiddi stundina í kirkjunni.

Félagar úr 7. bekk Fossvogsskóla fluttu þvínæst frumsamið lag Alexander on the wing.

Þar sungu þeir til Alexanders Mána Curtis stuðningsfulltrúa í Fossvogsskóla, en í textanum kom fram að þeir vilja alls ekki að Alexander láti af störfum núna í vor.

Þeim finnst greinilega mikið til hans koma og sungu þeir af mikilli innlifun.

Hólmfríður Ólafsdóttir djákni í Bústaðakirkju ól börnin sín upp í Fossvoginum og hefur starfað í Bústaðakirkju í yfir áratug.

Hún hélt hátíðarræðu og miðlaði reynslu sinni af því góða samfélagi sem er í Fossvoginum, sem birtist m.a. á sumardaginn fyrsta.

Sagði hún að margir ættu jákvæða reynslu af því að búa í Fossvoginum.

„Knattspyrnufélagið Víkingur er vettvangur okkar flestra og margra barna og ungmenna, skátarnir, félagsmiðlstöðin, skólarnir, kirkjan, þjónustumiðstöðvar borgarinnar, verslanir og hvað annað.

Allt eru þetta mikilvægir þættir góðs samfélags.“

Dagskránni í Bústaðakirkju lauk með einsöng Heiðrúnar Lóu, sem söng lag eftir Adele.

Hún verður fulltrúi hverfisins í söngvakeppni félagsmiðstöðvanna.

Þegar komið er inn í Bústaðakirkju blasa við listaverk barna.

Það eru listaverk barna af leikskólunum Garðaborg, Kvistaborg og Furuskógum, sem eru til sýnis í anddyri kirkjunnar.

Þar gefur að líta fjölbreytt úrval listaverka sem flest ef ekki öll minna á vorið og sumarið sem framundan er.

Dagskráin hélt síðan áfram í Víkinni, þar sem hoppukastalar voru í boði fyrir börnin, ís og fótboltagolf.

Kaffi og kleinur voru á boðstólnum fyrir hina fullorðnu.

Lesa má nánar um hátíðina á vef Fossvogsprestakalls.

slg

Myndir með frétt