Sumarbúðir kirkjunnar
Við EiðavatnSumarbúðirnar við Eiðavatn eru einu sumarbúðirnar á vegum Þjóðkirkjunnar, sem er fyrir börn.
Sumarbúðirnar hafa verið starfandi frá árinu 1968 og er þetta því 55. starfsár þeirra.
Frá árinu 1991 hafa sumarbúðirnar verið reknar í Kirkjumiðstöð Austurlands á Eiðum.
Að sögn Gunnfríðar Katrínar Tómasdóttur æskulýðsfulltrúa Austurlandsprófastsdæmis eru sumarbúðirnar vel sóttar.
“Í sumar hafa rúmlega 150 börn af landinu öllu komið og skemmt sér vel.
Flest hafa þó komið af Austurlandi.
Í ár voru fjórir flokkar í boði fyrir börn á aldrinum 7-14 ára.
Ásamt tveimur hefðbundnum flokkum var í boði listaflokkur og ævintýraflokkur.“
Hvað er gert í listaflokki?
„Í listaflokki voru búnar til kvikmyndir og listaverk ásamt því að hljóðfæri voru notuð í guðþjónustinni.
Í hverjum flokki er guðþjónusta sem börnin sjá um að mestu leyti.
Þau skreyta salinn, búa til bænir og flytja guðspjallið í leikrænu formi.“
En hvað er gert í ævintýraflokki?
„Í ævintýraflokki var gist úti undir berum himni sem var mikið ævintýri.
Einnig var farið í lengri göngu með börnunum sem endaði með íslenskri kjötsúpu í sumarbúðunum.
Við Kirkjumiðstöðina er einstaklega fögur náttúra og nýtum við hana mikið í útiveru“ segir Gunnfríður.
„Við förum í alls kyns leiki og höfum aðgang að fallegu vatni þar sem hægt er að fara út á bát, veiða og vaða á góðum dögum.
Við vatnið er eldstæði þar sem gott er að setjast niður á sumarkvöldum og jafnvel grilla sykurpúða.“
Að lokum bætir Gunnfríður við:
„Sumarbúðirnar við Eiðavatn eru óviðjafnanlegur vettvangur fyrir börnin að kynnast kristilegu starfi í gegnum leik og starf.
Einnig hafa margir velunnarar lagt hönd á plóg í gegnum tíðina sem er ómetanlegt og erum við mjög þakklát fyrir allt það góða starf.
Ekki má heldur gleyma að þakka fyrir það frábæra starfsfólk sem hefur starfað hjá okkur í sumar.
Það eru þau Ásdís Ægisdóttir, Kristrún Guðmundsdóttir, Tómas Sveinsson, Máni Þorsteinsson og Berglind Hönnudóttir ásamt aðstoðaleiðtogum.“
slg
Myndir með frétt
