Kjólar og pípur

Glæsilegir kjólar í Grafarvogskirkju

Hugmyndaauðgi þeirra sem starfa í kirkjunni er aðdáunarverð.

Það má sjá af verkefninu Kjólar og pípur sem fór fram í Grafarvogskirkju.

Sr. Arna Ýrr Sigurðardóttir segir aðspurð að viðburðurinn hafi hafist fimmtudaginn 8. júní.

Hún segir:

„Haldið var kjólauppboð og kjólasala, þar sem seldir voru kjólar sem konur höfðu gefið.

Þetta var gert í fjáröflunarskyni fyrir nýtt pípuorgel kirkjunnar.

Eva Ruza var kynnir og stjórnaði uppboðinu, Þuríður Sigurðardóttir söngkona flutti nokkur lög, sem og Vox Populi og Lára Bryndís Eggertsdóttir organisti kirkjunnar lék undir.

Tískusýningin og uppboðið voru hin besta skemmtun og að því loknu var handagangur í öskjunni hjá hinum rúmlega 200 konum sem mættu á viðburðinn að skoða, máta og kaupa kjóla.

Þess má geta að það söfnuðust 900.000 kr.

Og sr. Arna Ýrr bætir við:

„Enn er hægt að koma í kirkjuna og kaupa kjóla, á opnunartíma kirkjunnar.“

slg

Myndir með frétt