Ástarpostillan kemur út í nóvember
Prédikanasafn dr. Sigurðar Árna Þórðarsonar Ástin, trú og tilgangur lífsins verður gefið út í byrjun nóvember.
Í ritinu verða 78 prédikanir helstu helgidaga ársins.
Hallgrímskirkja styður útgáfu þessa prédikanasafns sem er úrval úr um eitt þúsund stólræðum og hugleiðingum höfundar á starfsferli hans sem prests.
Ritið verður stór bók og forlagið, Bjartur-Veröld-Fagurskinna, vandar útgáfuna.
Ragnar Helgi Ólafsson, rithöfundur og grafískur hönnuður, býr ritið til prentunar en hann er tilnefndur til bókmenntaverðlauna Norðurlandaráðs í ár.
Ragnar hannaði m.a. biblíuútgáfu JPV sem er á öllum ölturum kirkna landsins og notuð er í helgihaldi þjóðkirkjunnar og biblíulestri landsmanna síðustu fimmtán ár.
Ástin, trú og tilgangur lífsins – oft nefnd ástarpostillan - er gefin út við starfslok dr. Sigurðar Árna í Hallgrímskirkju.
Hún er einnig afmælisrit en höfundur verður sjötugur á Þorláksmessu.
Í bókinni verður heillaóskaskrá.
Frestur til að skrá nöfn er 10. september.
Þau er vilja setja nafn eða nöfn (t.d. hjóna eða systkina) í skrána eru beðin að senda nöfnin í tölvupósti og ganga frá greiðslu.
Pétur Már Ólafsson, forleggjarinn, tekur við nöfnum og netfang hans er pmo@bjartur.is.
Útgáfuhátíð og afmælisteiti er stefnt að því að halda þann 11. nóvember.
Dr. Sigurður Árni Þórðarson hefur starfað sem rektor Skálholtsskóla, fræðslustjóri þjóðgarðsins á Þingvöllum, verkefnisstjóri guðfræði og þjóðmála á Biskupsstofu og háskólakennari.
Hann hefur verið prestur í Ásaprestakalli, Staðarfellsprestakalli, Neskirkju og Hallgrímskirkju.
slg
