130 ár frá fæðingu Páls Ísólfssonar

Páll Ísólfsson

Í dag, 12. október, eru liðin 130 ár frá fæðingu Páls Ísólfssonar organista.

Hann var bæði orgel- og píanóleikari, hljómsveitar- og söngstjóri svo og tónskáld.

Páll gegndi mörgum störfum, en aðalstarf hans var að hann var dómorganisti við Dómkirkjuna í Reykjavík um árabil.

Páll var einn af forystumönnum í íslensku tónlistarlífi og mikill áhrifavaldur í kirkjumenningu og íslenskri tónlistarsögu.

Dómkirkjusöfnuðurinn og Tónskóli þjóðkirkjunnar minnast þessara tímamóta með messu í Dómkirkjunni þann 15. október næstkomandi kl. 11:00.

Þar munu tveir af nemendum Tónskólans þeir Hrafnkell Karlsson og Pétur Nói Stefánsson taka þátt í messunni.

Þeir leika forspil og eftirspil eftir Pál og Max Reger, en í ár eru 150 ár liðin frá fæðingu Regers.

Hann var meðal kennara Páls við tónlistarháskólann í Leipzig þar sem hann stundaði nám.

Kl. 12:30 sama dag flytur Bjarki Sveinbjörnsson fyrirlestur í safnaðarheimili Dómkirkjunnar um ævi og störf Páls.

„Hér er á ferðinni mjög áhugaverður viðburður um íslenska tónlistarsögu og kirkjumenningu“

segir í frétt frá Söngmálastjóra þjóðkirkjunnar og skólastjóra Tónskóla þjóðkirkjunnar.

slg