Biblíumaraþon

Æskulýðsstarf kirkjunnar er víða öflugt og margt er sér til gamans gert, þó aðaltilgangur æskulýðsfélaganna sé að hjálpa unglingum að feta sig á vegi kristinnar trúar.

Æskulýðsfélagið saKÚL í Árbæjarkirkju hefur fitjað upp á mörgum nýjungum í starfi sínu og sagði kirkjan.is frá því í fyrra þegar unglingarnir buðu kirkjugestum uppá skóburstun.

Á síðast liðnum árum hafa nokkur æskulýðsfélög farið í utanlandsferðir margar hverjar í samstarfi við kirkjur í Evrópu.

Nú stefna unglingarnir í æskulýðsfélaginu saKÚL í Árbæjarkirkju að því marki að lesa úr Biblíunni í hálfan sólarhring.

Ágóðinn rennur til ferðar æskulýðsfélagsins til Ungverjalands.

Unglingarnir taka við áheitum þar sem fólki gefst kostur á að styrkja þau til ferðarinnar.

Að sögn Ingunnar Bjarkar Jónsdóttur djákna þá byrja krakkarnir að lesa annað kvöld, föstudagskvöldið 10. nóvember.

Þau ætla að skiptast á að lesa alla nóttina fram til laugardagsins 11. nóvember kl. 09.00.

Fólki gefst kostur á að heita á þau 50- 100 kr. á hverja lesna klukkustund.

Hægt verður að fylgjast með lestrinum á facebook síðu Árbæjarkirkju þar sem streymt verður frá lestrinum.

Tilgangur biblíumaraþonsins er sem áður segir að safna áheitum til skyrktar ferð æskulýðsfélagsins til Ungverjalands haustið 2024.

Á síðu Árbæjarkirkju má finna leið til að senda áheit.

slg