Barnakór Lágafellskirkju tekur virkan þátt í samfélaginu

Lágafellskirkja

Umfjöllun um barnakóra í kirkjum landsins heldur áfram þessa viku.

Barnakór Lágafellskirkju var stofnaður haustið 2022 og hefur vaxið jafnt og þétt síðan.

Að sögn Valgerðar Jónsdóttur, sem stjórnar kórnum þá eru „nú tveir hópar starfræktir, eldri hópur fyrir 4.-7. bekk, þar sem eru 10 félagar og yngri hópur fyrir 1.-3. bekk þar sem eru 18 félagar.

Kórinn tekur þátt í fjölskyldumessum í Lágafellskirkju, syngur í guðsþjónustu á Æskulýðsdaginn og á fleiri viðburðum sem tengjast kirkjustarfinu.

Einnig heimsækjum við dvalarheimilið hér í Mosfellsbæ reglulega“ segir Valgerður.

„Í fyrra tókum við þátt í Söngvahátíð barnanna á Sumardaginn fyrsta í Víðistaðakirkju og verðum aftur með í ár í Hallgrímskirkju.

Einnig komum við fram á ýmsum stöðum fyrir jólin, til dæmis þegar ljósin voru tendruð á jólatrénu í Mosfellsbæ, á tónleikum með Varmárkórnum og á jólatónleikum Grétu Salóme í Hlégarði“

sagði Valgerður Jónsdóttir kórstjóri að lokum


slg