Barnakórastarf í Guðríðarkirkju í þremur hópum

Barnakórastarfið í Guðríðarkirkju í Grafarholti hefur vaxið og dafnað undanfarin ár.

Barnakórarnir eru hvorki meira né minna en þrír talsins.

Börn á aldrinum tveggja til þriggja ára tilheyra Bangsakór.

Börn á aldrinum fjögurra til fimm ára tilheyra Krílakór og börn í fyrsta bekk grunnskólans tilheyra Stjörnukór.

Að sögn sr. Maríu Rutar Baldursdóttur prests í Guðríðarkirkju þá koma vikulega um 50 börn saman í kirkjunni og æfa í 30-40 mínútur senn.

„Kórastarfið er gjaldfrjálst og er öllum boðið upp á hressingu fyrir eða eftir kennslu.

Áherslan í yngri kórunum er sönggleði og samvera og eru foreldrar hvattir til að taka þátt í stundinni.

Börnin fá þó líka tækifæri til þess að æfa sjálfstæði í gegnum skemmtilegar æfingar og leiki.

Í eldri hópum er auk þess áhersla á að efla taktskyn, tóneyra og tónsköpun.

Lagt er upp með að kórarnir komi fram í að minnsta kosti einni messu á hvorri önn og í lok annar eru haldnir glæsilegar tónleikar þar sem kórarnir láta ljós sitt skína“

segir sr. María Rut.

Með kórstjórn fara Alda Dís Arnardóttir og Arnhildur Valgarðsdóttir.

slg