Sr. Sigríður skipuð prófastur
Sr. Sigríður GunnarsdóttirSr. Sigríður Gunnarsdóttir sóknarprestur í Skagafjarðarprestakalli hefur verið skipuð prófastur í Húnavatns- og Skagafjarðarprófastsdæmi frá 15. apríl 2024.
Hún tekur við af sr. Döllu Þórðardóttur á Miklabæ, en hún lét af störfum þann 1. desember síðast liðinn.
Frá þeim tíma hefur sr. Gísli Gunnarsson vígslubiskup á Hólum gegnt prófstsstörfum.
Sr. Dalla var fyrst kvenna skipuð prófastur í Skagafjarðarprófstsdæmi þann 1. júní árið 1995 frá 1. september sama ár og eftir sameiningu prófastsdæmanna, prófastur í Húnavatns- og Skagafjarðarprófastsdæmi.
Sr. Sigríður er fædd þann 20. júlí árið 1975.
Hún varð stúdent frá Fjölbrautarskóla Norðurlands vestra árið 1995, og lauk cand. theol. prófi frá Háskóla Íslands árið 2003.
Hún var kirkjuvörður í Hóladómkirkju árin 2003-2005.
Sr. Sigríður vígðist þann 15. október árið 2006 til afleysinga í Sauðárkróksprestakalli og var síðan sett sóknarprestur í Sauðárkróksprestakalli frá 1.ágúst 2007.
Við sameiningu prestakallanna í Skagafirði var hún skipuð sóknarprestur í Skagafjarðarprestakalli frá 1. janúar 2023.
Sr. Sigríður lauk meistaraprófi í Forystu og stjórnun frá Háskólanum á Bifröst árið 2020.
Hún hefur sinnt ýmsum trúnaðarstörfum, meðal annars hefur hún setið í Löngumýrarnefnd um árabil og verið í stjórn Prestafélags Hólastiftis hins forna og verið í undirbúningsnefnd Þrettándaakademíu.
Sr. Sigríður er gift Þórarni Eymundssyni tamingamanni og lektor við Háskólann á Hólum.
Þau búa á Nautabúi í Hjaltadal.
Börn þeirra eru Eymundur Ás sem er fæddur árið 2002, Þórgunnur, sem er fædd árið 2005 og Hjördís Halla, sem fædd er árið 2010.
slg
