Ályktun Presta- og djáknastefnu 2024

Prestastefnu Íslands 2024 lýkur í dag í Stykkishólmi.

Í lokin voru önnur mál á dagskrá.

Í miðnefnd sem sér um önnur mál sitja sr. Sigríður Rún Tryggvadóttir, sem er formaður, sr. Bryndís Valbjarnardóttir og sr. Sigurður Már Hannesson

Ein ályktun kom fram sem sr. Stefán Már Gunnlaugsson kynnti.

Ályktunin er eftirfarandi:

Presta- og djáknastefna 2024 minnir á mikilvægi eflingar barna- og unglingastarfs og hvetur biskup Íslands og prófastsdæmin til að styðja dyggilega við æskulýðssambönd þjóðkirkjunnar.

Þau gegna mikilvægu og margvíslegu hlutverki, m.a. til þess að auka samvinnu, stuðla að faglegu starfi og fræðslu fyrir starfsfólk barna- og unglingastarfs.

Markmið þeirra er einnig að veita ungu fólki tækifæri til að hafa áhrif og taka þátt í uppbyggilegu starfi.

Jafnframt brýnir Presta- og djáknastefna kirkjuþing til þess að ráðið verði í stöður svæðisstjóra um allt land eins og samþykkt hefur verið.

Geinargerð sem fylgdi ályktuninni er á þessa leið:

Í skipulagi æskulýðsmála er gert ráð fyrir að svæðisstjórar séu starfandi á fjórum svæðum.

Hlutverk þeirra er m.a. að hafa tilsjón með æskulýðsstarfi á svæðinu, fylgja eftir stefnumörkun og samþykktum fyrir æskulýðsstarf, stuðla að safnaðarstarfi fyrir ungmenni s.s. að skipuleggja æskulýðsmót o.fl.

Nauðsynlegt er að svæðisstjórar hafi traust bakland og eigi samstarf við starfsfólk í æskulýðsstarfi.

Í stjórnum æskulýðssambanda starfar ungt fólk og starfsfólk sem vinnur að sameiginlegum hagsmunum æskulýðsstarfsins.

Undir þessa ályktun skrifa:

Sr. Stefán Már Gunnlaugsson, sr. Magnús Magnússon, sr. Arna Grétarsdóttir, sr.  Arndís G. Linn og sr. Erla Guðmundsdóttir.

Ályktunin var samþykkt samhljóða.


slg