Andlát

Sr. Frank M. Halldórsson

Sr. Frank M. Halldórsson fyrrum sóknarprestur í Nessókn, lést á bráðadeild Landspítalans í Fossvogi þann 31. júlí síðastliðinn 90 ára að aldri.

Frank fæddist í Reykjavík þann 23. febrúar árið 1934.

Foreldrar hans voru Rose Evelyn Halldórsson og Nikulás Marel Halldórsson.

Systkini hans eru Betsy R. Halldórsson og Georg S. Halldórsson.

Frank varð stúdent frá Menntaskólanum í Reykjavík árið 1954 og las guðfræði við Háskóla Íslands.

Hann nam guðfræði í Sviss við The Graduate School of Ecumenical Studies í Chateau de Bossey og við Háskólann í Heidelberg í Þýskalandi.

Hann lauk embættisprófi í guðfræði frá Háskóla Íslands í janúar 1959 og prófi í uppeldis- og kennslufræðum frá Háskóla Íslands árið 1971.

Kennsluferil sinn hóf hann sem stundakennari við Mýrarhúsaskóla en lengst kenndi hann við Hagaskóla frá árinu 1959 til 1987.

Sr. Frank var skipaður sóknarprestur í Nesprestakalli frá 1. janúar 1964 og gegndi því starfi til ársins 2004.

Þá þjónaði hann einnig Seltjarnarnessókn, sem stofnuð var út úr Nesprestakalli árið 1974, allt þar til sérstakur prestur kom þar til þjónustu árið 1986.

Í Neskirkju var mjög öflugt safnaðarstarf og voru afar vinsælar sumarferðir safnaðarfólks bæði innan lands og utan.

Framhaldsnám í sálgæslu nam hann við The University of Texas í Houston í Bandaríkjunum frá árinu 1987 til ársins 1989 og starfaði hann þá jafnframt sem sjúkrahúsprestur við M.D.Anderson Hospital í Houston.

Sr. Frank hafði mikinn áhuga á að kynna söguslóðir Biblíunnar og í sextán ár ráku þau Jóna Hansen ferðaskrifstofuna Víðsýn og með þeim fór fjöldi Íslendinga á þær slóðir.

Sr. Frank var formaður Prestafélags Suðurlands í tíu ár og sat í skipulags og starfsháttanefnd Reykjavíkurprófastsdæmis í þrjú ár.

Útför sr. Franks M. Halldórssonar verður gerð frá Neskirkju, mánudaginn 26. ágúst kl. 15.00.

slg