Sr. Jóhanna ráðin

Sr. Jóhanna

Biskup Íslands óskaði nýlega eftir sóknarpresti til þjónustu við Víkurprestakall í Suðurprófastsdæmi.

Miðað var við að viðkomandi gæti hafið störf 1. september n.k.

Tvær umsónkir bárust og hefur valnefnd valið sr. Jóhönnu Magnúsdóttur í starfið.

Biskup Íslands hefur staðfest ráðninguna.

Prestakallið

Í Víkurprestakalli í Suðurprófastsdæmi eru sex sóknir.

Heildaríbúfjöldi er 1.409 og sóknarbörn eru 441.

Prestakallið afmarkast af Markarfljóti að vestan auk Hólmabæja, vestan Markarfljóts og Blautukvísl á Mýrdalssandi að austan.

Víkurprestakall er á samstarfssvæði með Kirkjubæjarklaustursprestakalli.

Í prestakallinu eru átta guðshús.

Húsnæði fyrir sóknarprest er til staðar í Vík og starfsaðstaða hans er í sameiginlegu húsnæði á vegum sveitarfélagsins.

Vík er stærsti byggðarkjarni prestakallsins og þar búa flest sóknarbörnin.

Þar er leikskóli, grunnskóli og tónlistarskóli.

Í Vík er hjúkrunar og dvalarheimilið Hjallatún.

Sr. Jóhanna Magnúsdóttir er fædd í Reykjavík árið 1961, dóttir Magnúsar Björnssonar og Valgerðar Kristjánsdóttur.

Jóhanna ólst upp í Reykjavík þaðan sem hún lauk stúdentsprófi og cand. theol. gráðu frá Háskóla Íslands.

Í framhaldi lauk hún kennsluréttindanámi frá Kennaraháskóla Íslands.

Hún hefur fjölbreytta starfsreynslu.

Hún starfaði m.a. sem aðstoðarskólastjóri Menntaskólans Hraðbrautar í sex ár að loknu háskólaprófi.

Hún var vígð sem sérþjónustuprestur til Sólheima í Grímsnesi árið 2015.

Hún hefur síðan sinnt prestsþjónustu í Skálholtsprestakalli, Kirkjubæjarklaustursprestakalli og einnig leyst af í Digranes og Hjallaprestakalli.

Sr. Jóhanna hefur auk þess reynslu af kirkjustarfi, starfað sjálfstætt sem ráðgjafi og unnið við námskeiðahald auk þess að starfa við kennslu fyrir símenntunarmiðstöðvar.

Sr. Jóhanna á þrjú börn og þrjú barnabörn.

slg