Biskup Íslands í Prag

Guðrún biskup í ræðustól

Nú stendur yfir Evrópufundur Lútherska heimssambandsins í Prag.

Fulltrúar íslensku kirkjunnar eru biskup Íslands, Guðrún Karls Helgudóttir, dr. Arnfríður Guðmundsdóttir sem er varaforseti Lútherska heimssambandsins fyrir Norðurlöndin og Magnea Sverrisdóttir djákni og verkefnastjóri samkirkjumála á biskupsstofu.

Einnig situr fundinn sr. Árni Svanur Daníelsson, samskiptastjóri Lútherska heimssambandsins, en hann starfar í aðalstöðvum sambandsins í Genf.

Magnea situr í undirbúningsnefnd fyrir Evrópufundinn.

Fréttaritari kirkjan.is hafði samband við Magneu og bað hana um að segja sér frá fundinum.

„Hér eru 70 manns frá 35 lútherskum kirkjum alls staðar frá Evrópu.

Evrópu er skipt niður í þrjú svæði, Norðurlönd, Austur- og Vestur-Evrópu.

Til umræðu á fundinum er hvert við stefnum í ljósi heimsþings sambandsins sem haldið var í fyrra í Krákow.

Við erum að ræða um hverjar eru vonir og væntingar kirkna í Evrópu til samstarfsins næstu árin.

Stríðsátök í heiminum nær og fjær hafa líka verið til umræðu og hvernig við sem kirkjur og samfélög tökumst á við þennan veruleika.

Helgihald á fundum á vegum Lútherska heimssambandsins er mikilvægt og mikið í það lagt og þar erum við öll sameinuð sem eitt frammi fyrir Guði í bæn“

segir Magnea að lokum.

Hér fyrir neðan má sjá mynd af varaforsetunum frá Evrópu, Kristinu Kühnbaum-Schmidt biskupi frá Þýskalandi, dr. Arnfríði Guðmundsdóttur og dr. Tamás Fabiny, biskupi frá Ungverjalandi.

slg

Myndir með frétt