Tveir nýir prestar koma til starfa

Laufey Brá og Sigríður Kristín

Biskup Íslands auglýsti nýlega eftir tveimur prestum til þjónustu við Fossvogsprestakall í Reykjavíkurprófastsdæmi vestra.

Sjö umsóknir bárust.

Laufey Brá Jónsdóttir sóknarprestur í Setberegsprestakalli og Sigríður Kristín Helgadóttir fyrrum sóknarprestur í Breiðabólsstaðarprestakalli hafa verið ráðnar.

Laufey Brá Jónsdóttir er fædd á Sólvangi í Hafnarfirði þann 22. júlí árið árið 1972.

Hún er dóttir hjónanna Jóns Víðis Steindórssonar og Rannveigar Sigríðar Guðmundsdóttur.

Laufey Brá er gift Jóni Inga Hákonarsyni bæjarfulltrúa í Hafnarfirði.

Hún er stúdent frá Flensborgarskólanum.

Að loknu stúdentsprófi lá leiðin í Leiklistarskóla Íslands þar sem hún útskrifaðist sem leikkona.

Laufey Brá hefur meistaragráðu í mannauðsstjórnun og er með menntun markþjálfa.

Hún er nú að klára diplómanám í sálgæslu auk guðfræðimenntunarinnar.

Starfsþjálfun tók Laufey Brá hjá Sigurði Arnarsyni sóknarpresti í Kópavogskirkju.

Laufey Brá vann í sex ár sem ráðgjafi í Kvennaathvarfinu.

Hún hefur einnig unnið sem leikstjóri og umsjónarkennari.

Laufey Brá hefur skrifað efni fyrir fræðslusvið Biskupsstofu og unnið með atvinnuleitendum í hruninu.

Hún vígðist þann 10. desember árið 2023 sem sóknarprestur í Setbergsprestakalli.

Sigríður Kristín Helgadóttir er fædd þann 19. september árið 1971 í Reykjavík.

Hún ólst upp í Hafnarfirði og dvaldi vestur á fjörðum sumarlangt sem barn og unglingur.

Hún býr í Hafnarfirði hefur starfað sem prestur í Fossvogsprestakalli í vetur.

Sigríður Kristín er gift Eyjólfi Einari Elíassyni matreiðslumanni sem starfar sem forstöðumaður framleiðslueldhúss á velferðarsviði Reykjavíkurborgar.

Þau eiga fjórar dætur, sem fæddar eru 1991, 1995, 1999 og 2000.

Hún tók stúdentspróf frá Kvennaskólanum í Reykjavík árið 1991 og embættispróf frá Guðfræðideild Háskóla Íslands árið 2000.

Árið 2011 lauk hún námi í fjölskyldumeðferð á meistarastigi frá Endurmenntun Háskóla Íslands.

Í starfsþjálfun þjóðkirkjunnar voru leiðbeinendur hennar sr. Bjarni Karlsson og sr. Jóna Kristín Þorvaldsdóttir.

Sigríður Kristín stundaði nám við Tónlistarskóla Kópavogs 2004 -2005 og lærði söng hjá Önnu Júlíönu Sveinsdóttur.

Hún vígðist til prestsþjónustu þann 15. október árið 2000.

Þá hafði hún verið kölluð til starfa hjá Fríkirkjunni í Hafnarfirði og var sett í embætti þann 22. október sama ár.

Hún var ráðin til starfa sem sóknarprestur í Breiðabólstaðarprestakalli þann 13. júlí árið 2020.

Síðan var hún ráðin til starfa í afleysingu prests í Fossvogsprestakalli frá 1. ágúst árið 2024.

Hún hefur komið að starfi Sorgarmiðstöðvar í Lífsgæðasetri St. Jó., haldið fyrirlestra og leitt hópastarf vegna ótímabærs makamissis, systkinamissis og missis á meðgöngu.

Einnig hefur hún verið með fræðsluerindi fyrir börn bæði hjá Ljónshjarta og í Sorgarmiðstöðinni.

slg