Sr. Sigurður Már ráðinn sóknarprestur
Sr. Sigurður MárSr. Sigurður Már Hannesson hefur verið ráðinn sóknarprestur við Seljasókn í Reykjavík.
Hann er fæddur árið 1990 og upp alinn í Reykjavík.
Foreldrar hans eru þau Hannes Már Sigurðsson og Brynja Jónsdóttir.
Sigurður Már lauk stúdentsprófi frá Verzlunarskóla Íslands árið 2010, stundaði nám í viðskiptafræði við Háskóla Íslands, en leiðin lá svo í guðfræðideildina.
Árið 2016 stundaði Sigurður Már skiptinám í Kaupmannahöfn, þar sem hann nam guðfræði við Kaupmannahafnarháskóla.
Hann útskrifaðist síðan með embættispróf í guðfræði frá Háskóla Íslands vorið 2020.
Hann var vígður til prestsþjónustu hjá Kristilegu skólahreyfingunni í mars árið 2021.
Samhliða starfi sínu sem skólaprestur sinnti hann einnig ýmsum verkefnum fyrir KFUM og KFUK.
Í júní árið 2022 valdi valnefnd Sigurð Má til þess að þjóna við Seljaprestakall.
Haustið 2024 hóf hann að starfa sem sóknarprestur Seljakirkju í afleysingum, en í desember það sama ár fór sóknarnefnd Seljakirkju fram á að Sigurður Már yrði settur í embætti sóknarprests, eftir að sr. Ólafur Jóhann Borgþórsson sagði starfi sínu lausu.
Eiginkona Sigurðar Más er Heiðdís Haukdal Reynisdóttir, verkefnastjóri í stafrænum kennslumálum hjá Háskóla Íslands.
Þau eiga eina dóttur og aðra á leiðinni.
slg
