Skrifstofa biskups Íslands á Vestfjörðum
Skrifstofa Guðrúnar Karls Helgudóttur, biskups Íslands, flyst til Vestfjarða í næstu viku. Með biskupi í för verða Eva Björk Valdimarsdóttir biskupsritari auk Heimis Hannessonar og Tinnu Miljevic af samskiptasviði Þjóðkirkjunnar.
Opin dagskrá er svohljóðandi:
Á Uppstigningardag, fimmtudaginn 29. maí, prédikar biskup í messu í Ísafjarðarkirkju í tilefni 30 ára afmælis kirkjunnar. Messukaffi verður í safnaðarheimili Ísafjarðarkirkju og boðið upp á samtal við biskup.
Klukkan 17:00 þann 29. maí klárar biskup Íslands ásamt bæjarstjóra Ísafjarðarbæjar að mála regnbogann á Silfurtorgi.
Á föstudag 30. maí verður biskup með opna viðtalstíma í safnaðarheimili Ísafjarðarkirkju á milli 10:00 og 13:00. Hægt er að bóka fundi á biskup@kirkjan.is .
Nokkra daga á ári flytur biskup Íslands skrifstofu sína í hvern landshluta og er það liður í að efla tengsl innan kirkjunnar og stytta boðleiðir milli kirkjufólks um land allt og biskups. Fyrir áramót fluttu Guðrún og samstarfsfólk hennar skrifstofur sínar austur á Hérað og í nóvember á Hellu á Suðurlandi. Í byrjun árs voru skrifstofur biskups á Norðurlandi.
Aðspurð segist Guðrún hlakka til heimsóknarinnar vestur. Aðrar heimsóknir hafi lukkast vel og að gott sé að sjá áhugann og þátttöku í umræðum um kirkjuna. Hún eigi ekki von á neinu öðru en framhaldi á því á Ísafirði í næstu viku.
