Aðfangadagur hvítasunnu

Litur: Rauður

Vers vikunnar:
„Ekki með valdi né krafti heldur fyrir anda minn, segir Drottinn allsherjar.“ (Sak 4.6b) 

Bæn dagsins.
Huggunar andi, eldur Guðs. 
Þú ert lífskraftur alls hins skapaða. 
Í þér mætum við Guði. 
Þú safnar hinum villuráfandi saman í sannleikanum 
og lætur þau skilja hvert annað. 
Þökk sé þér. Amen.

Þriðja lestraröð

Lexía: 1Kon 19.1-10 (11-13)
Akab sagði Jesebel frá öllu sem Elía hafði gert og að hann hefði drepið alla spámennina með sverði. Jesebel sendi þá mann til Elía með þessi skilaboð: „Guðirnir geri mér hvað sem þeir vilja, nú og héðan í frá, hafi ég ekki um þetta leyti á morgun farið með líf þitt líkt og líf eins af spámönnunum.“ Elía varð hræddur, bjó sig til ferðar og flýði til að bjarga lífi sínu. Er hann kom til Beerseba í Júda skildi hann þjón sinn þar eftir.
Sjálfur hélt hann eina dagleið inn í eyðimörkina. Þar settist hann undir einiberjarunna og óskaði þess eins að deyja og mælti. „Mál er nú, Drottinn, að þú takir líf mitt því að ég er engu betri en feður mínir.“ Síðan lagðist hann þar fyrir og sofnaði. En skyndilega kom engill, snerti hann og sagði: „Rís upp og matast.“ Hann litaðist um og sá þá glóðarbakað brauð og vatnskrukku við höfðalag sitt. Hann át og drakk og lagðist síðan fyrir aftur.
Þá kom engill Drottins öðru sinni, snerti hann og sagði: „Rís upp og matast. Annars reynist þér leiðin of löng.“ Hann reis upp, át og drakk. Endurnærður af máltíðinni gekk hann í fjörutíu daga og fjörutíu nætur þar til hann kom að Hóreb, fjalli Guðs. Þar kom hann að helli og svaf þar um nóttina. Allt í einu kom orð Drottins til hans: „Hvað ertu að gera hér, Elía?“ Hann svaraði: „Af brennandi ákafa hef ég lagt mig fram vegna málefnis Drottins, Guðs hersveitanna, því að Ísraelsmenn hafa snúið frá sáttmálanum við þig. Þeir hafa rifið niður ölturu þín og drepið spámenn þína með sverði. Ég er einn eftir og nú sitja þeir um líf mitt.“ Drottinn svaraði: „Far út og gakk fram fyrir auglit Drottins uppi á fjallinu.“ Þá gekk Drottinn þar hjá. Gífurlegur stormur fór fyrir Drottni, svo öflugur að hann molaði fjöll og klauf kletta. En Drottinn var ekki í storminum. Eftir storminn varð jarðskjálfti. En Drottinn var ekki í jarðskjálftanum. Eftir jarðskjálftann kom eldur. En Drottinn var ekki í eldinum. Eftir eldinn kom þytur af þýðum blæ. Þegar Elía heyrði hann huldi hann andlit sitt með skikkju sinni, gekk út og tók sér stöðu við hellismunnann. Þá barst honum rödd sem spurði: „Hvað ert þú að gera hér, Elía?“

Pistill: 1Kor 12.7-13
Þannig birtist andinn sérhverjum manni til þess að hann geri öðrum gagn. Einum gefur andinn gáfu að mæla af speki, öðrum gefur sami andi kraft að mæla af þekkingu. Sami andi veitir einum trú, öðrum lækningagáfu 1og öðrum kraft til að framkvæma undur. Einn fær spádómsgáfu, annar hæfileika að sannreyna anda, einn að tala tungum og annar að útleggja tungutal. Öllu þessu kemur eini og sami andinn til leiðar og hann útbýtir hverjum einum eftir vild sinni.

Því að eins og líkaminn er einn og hefur marga limi en allir limir líkamans, þótt margir séu, eru einn líkami, þannig er og Kristur. Í einum anda vorum við öll skírð til að vera einn líkami, hvort sem við erum Gyðingar eða Grikkir, þrælar eða frjálsir, og öll fengum við einn anda að drekka.

Guðspjall: Jóh 7.37-39
Síðasta daginn, hátíðardaginn mikla, stóð Jesús þar og kallaði: „Ef nokkurn þyrstir þá komi hann til mín og drekki. 38Frá hjarta þess sem trúir á mig munu renna lækir lifandi vatns, eins og ritningin segir.“ 39Þarna átti hann við andann er þau skyldu hljóta sem á hann trúa. Því enn var andinn ekki gefinn þar eð Jesús var ekki enn dýrlegur orðinn.

Sálmur 828
Guð helgur andi himni af
hallelúja, hallelúja!
kom heimsins til og gjafir gaf.
Hallelúja! hallelúja!

Hann treystir oss að túlka Krist,
hallelúja, hallelúja!
og tala nýjum tungum víst.
Hallelúja! hallelúja!

Hann sína efldi sendimenn,
hallelúja, hallelúja!
með sannleiksljóma´ er lýsir enn.
Hallelúja! hallelúja!

Þeir frjálsir sannleik flytja hér,
hallelúja, hallelúja!
Í orði Jesú lífið er.
Hallelúja! hallelúja!

Þar heyrum Drottins hljóma orð
hallelúja, hallelúja!
og hvíld fær hjartað Guðs við borð.
Hallelúja! hallelúja!

Og sálin sem í skuggsjá hér
hallelúja, hallelúja!
síns Drottins ljós og ljóma sér.
Hallelúja! hallelúja!

Hér heilagt byggir hús Guðs orð
hallelúja, hallelúja!
við Drottins laug og Drottins borð.
Hallelúja! hallelúja!

Og nýtt vér syngjum lofsöngslag
hallelúja, hallelúja!
með englum himins hér í dag.
Hallelúja! hallelúja!

Á hvítasunnuhátíð nú,
hallelúja, hallelúja!
vér fögnum saman frjáls í trú.
Hallelúja! hallelúja!

N.F.S. Grundtvig - Einar Sigurbjörnsson.