8. sunnudagur eftir þrenningarhátíð - Ávextir andans

Litur: Grænn

Vers vikunnar:
„Hegðið ykkur því eins og börn ljóssins. – Því að ávöxtur ljóssins er einskær góðvild, réttlæti og sannleikur.“ (Ef 5.8b-9)

Bæn dagsins:
Drottinn Jesús Kristur. Þú sem kallar söfnuð þinn til að vera salt jarðar og ljós heimsins, við biðjum þig. Hjálpa okkur til að vera ekki treg heldur tilbúin til að þjóna þér og bera ljós miskunnar þinnar inn í dimmu þessa heims. Lofað sé nafn þitt að eilífu. Amen.

Þriðja lestraröð

Lexía: Jes 2.1-5
Þetta er það sem Jesaja Amotssyni vitraðist um Júda og Jerúsalem. Það skal verða á komandi dögum að fjallið, sem hús Drottins stendur á, bifast ekki, það ber yfir hæstu fjallstinda og gnæfir yfir allar hæðir. Þangað munu allar þjóðir streyma og margir lýðir koma og segja: „Komið, göngum upp á fjall Drottins, til húss Jakobs Guðs svo að hann vísi oss vegu sína og vér getum gengið brautir hans.“ Því að fyrirmæli koma frá Síon, orð Drottins frá Jerúsalem. Og hann mun dæma meðal lýðanna og skera úr málum margra þjóða. Og þær munu smíða plógjárn úr sverðum sínum og sniðla úr spjótum sínum. Engin þjóð skal sverð reiða að annarri þjóð og ekki skulu þær temja sér hernað framar. Ættmenn Jakobs, komið, göngum í ljósi Drottins

Pistill: 2Kor 4.5-7
Ekki prédika ég sjálfan mig heldur prédika ég að Kristur Jesús sé Drottinn og hann sendi mig til að vera þjónn ykkar. Því að Guð sem sagði: „Ljós skal skína fram úr myrkri!“ lét það skína í hjarta mitt til þess að birtu legði af þekkingunni á dýrð Guðs eins og hún skín frá ásjónu Jesú Krists. En þennan fjársjóð ber ég í leirkerum til þess að sýna að krafturinn mikli kemur frá Guði en ekki frá mér.

Guðspjall: Matt 7.12-14
Allt sem þér viljið að aðrir menn geri yður, það skuluð þér og þeim gera. Því að þetta er lögmálið og spámennirnir. Gangið inn um þrönga hliðið. Því að vítt er hliðið og vegurinn breiður sem liggur til glötunar og margir þeir sem þar fara inn. Hve þröngt er það hlið og mjór sá vegur er liggur til lífsins og fáir þeir sem finna hann.

Sálmur 702
Guð sem skapar líf og ljós,
lætur vakna hverja rós.
Hann er Guð sem gefur þér
góðan dag og einnig mér.

Myrkrið hrekur hann á braut,
hjálpar vel í sorg og þraut.
Hvert sem leiðin liggur þín
lýsir hann þér heim til sín.

Láttu, Drottinn, lýsa enn
ljósið þitt, svo allir menn
hér á jörðu, hvar sem er,
heiðri þig og fylgi þér.

Kristján Valur Ingólfsson