Gullna reglan svokallaða er ein megin undirstaða kristinnar siðfræði. Hana er að finna í ræðu Jesú Krists í Matteusarguðspjalli sem kölluð er fjallræðan. Gullna reglan hljóðar þannig með orðum Jesú:

Allt sem þér viljið að aðrir menn gjöri yður, það skuluð þér og þeim gjöra

Álíka kenningu er að finna víðar í sögunni en hjá Jesú. „Ekki gera öðrum það sem þú vilt ekki að aðrir geri þér, þá mun engum mislíka við þig“ - kenndi kínverski spekingurinn Konfúsíus löngu fyrir daga Jesú. Og – „Þetta er grundvallarskylda: Ekki gera öðrum það sem þú vilt ekki að þeir geri þér“ - stendur í hinu mikla verki hindúismans Mahabharata. Hillel, einn fremsti rabbíni gyðinga sem uppi var um svipað leiti og Jesús sagði: „Ekki gera öðrum það sem er andstætt þér- þetta er kjarni lögmálsins, allt annað eru bara skýringar á þessu“. Og þannig mætti lengi telja

En Jesús Kristur er sá eini sem sett hefur þessa reglu fram í því formi sem birtist í fjallræðunni. Hann var umfram allt byltingarmaður og umbreytti öllum hefðbundnum kenningum. Oft hóf hann ræðu sína með því að segja :„Þér hafið heyrt að sagt var.en ég segi yður“. Þannig umbylti hann líka gullnu reglunni. Kristinn maður á ekki aðeins að láta vera að gera öðrum eitthvað sem hann vill ekki að þeir geri sér. Hann á að grípa frumkvæðið og gera það fyrir aðra sem hann myndi vilja að þeir gerðu fyrir sig. Hann á að ganga fram fyrir skjöldu, án þess að ætlast til nokkurs í staðin, gera gott, í nafni kærleikans, ekki aðeins að láta vera að gera illt. Á þessu tvennu er reginmunur.

Með þessari einföldu reglu gerir Jesús umhyggjuna fyrir náunganum að kjarnanum í lífi hvers kristins manns. Enginn getur fylgt Jesú nema með því að sýna náunganum kærleika í verki. Gullna reglan eins og hann setti hana fram er byltingarboðskapur og sem slíkur er hann undirstaða allra hugmynda okkar nútímamanna um jafnrétti, manngildi og mannréttindi.