Vígslubiskupar,
prestar, djáknar og gestir. Meira en tvö
ár eru frá því síðasta hefðbundna prestastefna var haldin. Hún fór fram 30 apríl - 2. maí 2019 og var
haldin í Áskirkju í Reykjavík.
Í dag er
presta- og djáknastefnan sett með óvenjulegum hætti en ekki nýstárlegum því við
erum orðin vön því að funda í gegnum fjarfundabúnað. Í fyrra varð ekkert af
stefnunni sökum heimsfaraldursins og á þessu ári geisar faraldurinn enn um
heiminn og því þurfti að finna nýjar leiðir til að koma henni á. Eins og fram hefur komið í pósti fer hún fram
með prestum og djáknum í hverju prófastsdæmi fyrir sig auk þess sem emerítar
funda með biskupi. Samtals verður
stefnan því á tíu stöðum á landinu.
Fundirnir byrja strax á morgun og verður lokið eftir fimm til sex
vikur. Vænti ég þess að eiga
hreinskiptar og opnar samræður við ykkur í ykkar héruðum um þau mál sem brenna
á ykkur og okkar kirkju.
Meginefni
stefnunnar bæði í fyrra og núna átti að vera skírnin. Einn fyrirlestur flutti okkur Haraldur
Hegstad í apríl s.l. en hann er í forsvari fyrir norræna skírnarverkefnið sem
við höfum haft tækifæri til að taka þátt í í gegnum fjarfundabúnað.
Ég þakka þeim
sem undirbúið hafa þessa stefnu með mér en þar fara fremst í flokki
biskupsritari sr. Þorvaldur Víðisson og fulltrúar stjórnar prestafélagsins sem
og starfsfólk Biskupsstofu.
Heimsfaraldur
Það hefur
ekki farið fram hjá neinum að faraldur hefur geisað um heiminn. Covid 19 sjúdómurinn hefur haft mikil áhrif á
kirkjustarfið enda fer þjónusta og starf kirkjunnar að mestu leyti fram í
samfélagi manna. Ég vil þakka prestum,
djáknum, organistum, kirkjukórum, kirkjuvörðum og öðru starfsfólki kirknanna
fyrir þolinmæði, hugmyndaauðgi, kraft og dug á þessum erfiðu tímum. Þið hafið verið lausnamiðuð og opin fyrir því
að finna og reyna nýjar leiðir til boðunar og þjónustu. Reglur hafa breyst mjög oft og ekki alltaf
gott að átta sig á hvernig beri að túlka þær á vettvangi kirkjunnar. Oftar en ekki höfum við á biskupsstofu fengið
svör við spurningum okkar hjá embætti landlæknis eða ráðuneyti heilbrigðismála
áður en upplýsingabréfin hafa verið send út.
Þau eru nú orðin 30. Það fyrsta
var sent út 29. febrúar 2020 og það síðasta í dag.
Breytingar
Miklar
breytingar hafa verið á Biskupsstofu frá síðustu prestastefnu. Stofan flutti úr húsnæði kirkjmálasjóðs á
Laugaveginum í leiguhúsnæði í Katrínartúni 4 en það húsnæði var aldrei hugsað
sem framtíðarhúsnæði. Nú er nefnd á
vegum embættisins að skoða möguleika á framtíðarhúsnæði fyrir þessa
þjónustustofnun þjóðkirkjunnar.
Starfsfólki á biskupsstofu hefur fækkað um einn tug eða svo á árinu og
oftar en ekki hefur starfsfólkið unnið heima vegna takmarkana á covid tímanum. Undanfarin ár hafa allar prestsstöður verið
auglýstar með viðbótarskyldum og hafa þær verið virkjaðar að einhverju
leyti. Viðbótarsamkomulag við ríkið og
ný lagasetning í kjölfar þess hefur kostað gríðarlega vinnu bæði starfsfólks og
kirkjuþingsfólks. Allt þetta hefur
skapað mikið álag á marga og vil ég þakka öllum þeim sem lagt hafa hönd á plóg
fyrir gott og óeigingjarnt starf í þágu þjóðkirkjunnar.
Fjármál
Eins og
kunnugt er breyttist fjárhagslegt fyrirkomulag þjóðkirkjunnar við gildistöku
viðbótarsamkomulagsins við ríkið. Sjóðir
kirkjunnar voru lagðir niður og nú er einn ársreikningur gerður fyrir
þjóðkirkjuna í heild. Sá fyrsti sem
gerður var, var fyrir árið 2020 og sýndi mikinn halla á rekstrarárinu. Sex mánaða uppgjör þessa árs sýnir að hallinn
verður umtalsvert minni í ár ef síðari hluti ársins verður með sama hætti og sá
fyrri. Ljóst er að nokkurn tíma tekur að
koma jafnvægi á fjármál þjóðkirkjunnar og sýnist mér að það náist ekki nema með
sölu fasteigna sem ekki eru taldar gefa af sér til lengri tíma litið og með
fækkun starfa þar sem því verður við komið. Þá verður að meta með þeim sem best
til þekkja hvort að hægt sé að fækka störfum, endurskipuleggja og hagræða. Kirkjuþing
hefur síðasta orðið í þeim efnum enda er það á ábyrgð þess að stjórna
fjárstreymi til hinnar biðjandi, boðandi og þjónandi kirkju.
Byggðastefna
Þjóðkirkjan
hefur hingað til haldið úti byggðastefnu sem gengur út frá því að fólk njóti
þjónustu hennar í nærsamfélaginu. Með
bættum samgöngum og fjarskiptum hefur verið hægt að hafa meiri samvinnu milli
presta og starfsfólks safnaðanna.
Stækkun prestakallanna er þróunarverkefni sem tekur tíma að móta á
hverjum stað fyrir sig. Þegar lagt er
upp í þann leiðangur hefur biskupafundur leitast við að ná samstöðu meðal
heimafólks um að leggja málið fyrir kirkjuþing.
Þegar sameiningin hefur verið samþykkt á kirkjuþingi hefur verið fundað
með hlutaðeigandi og farið yfir sameiningarferlið eftir ákveðnu skipulagi sem
sent hefur verið til fundarfólks fyrir fundinn.
Einnig hefur starfsfólk biskupsstofu og vígslubiskupar farið til fundar
við fólkið í kirkjunni þar sem þess er óskað.
Sérþjónusta
kirkjunnar
Á þessu ári
var nafni fjölskylduþjónustu kirkjunnar breytt í fjölskyldu- og
sálgæsluþjónusta kirkjunnar. Hún er nú
til húsa á neðri hæð í safnaðarheimili Háteigskirkju. Hún er hluti af
sálgæslustarfi kirkjunnar og þjónar öllu landinu. Til hennar getur hver sem er leitað sem
þarfnast ráðgjafar vegna vanda í samskiptum eða vilja finna nýjar lausnir.
Sem fyrr
sinnir fjölskyldu- og sálgæsluþjónustan handleiðslu fyrir presta, djákna og
aðra sem starfa á vegum kirkjunnar. Í
einstökum tilfellum er boðið upp á einstaklingshandleiðslu. Félagsráðgjöfunum Elísabetu Bertu
Bjarnadóttur og Rannveigu Guðmundsdóttur er þakkað áralangt starf á
fjölskylduþjónustunni sem og Benedikt Jóhannssyni sálfræðingi. Nýtt starfsfólk er boðið velkomið til starfa,
félagsráðgjafarnir Andrea Baldursdóttir og Guðrún Kolbrún Otterstedt og sr.
Vigfús Bjarni Albertsson sem veitir starfinu forstöðu.
Þann 25. febrúar á þessu ári opnaði Skjólið í kjallara Grensáskirkju í Reykjavík. Forsaga þess máls nær til ársins 2016. Í apríl mánuði það ár vorum við biskupsstofufólk í kynnis- og fræðsluferð í Boston. Við heimsóttum m.a. University Lutheran Church þar sem Kathleen O´Keefe Reed prestur safnaðarins og Jayms Battaglia starfsmaður tóku á móti okkur og kynntu fyrir okkur starf safnaðarins á meðal stúdenta og kennara á háskólasvæðinu. Jafnframt kynntu þau starfsemi gistiskýlis sem söfnuðurinn rekur. Þessi kynning hreyfði við tilfinningum mínum og þrá eftir því að Kirkjan mín geti komið að því að „létta bróður böl og bæta raunir hans“ eins og Sigurbjörn Einarsson biskup orðar svo fallega í sálmi sínum „Þú Drottinn átt það allt“. Nefnd undir forystu Ragnheiðar Sverrisdóttur djákna vann að málinu eftir að kirkjuráð samþykkti að styrkja verkefnið. Eftir ýmsar vangaveltur, kynningar og vinnu var niðurstaðan að dagsetrið, sem hlotið hefur heitið SKJÓLIÐ yrði fyrir konur og væri í húsnæði þjóðkirkjunnar í kjallara Grensáskirkju sem áður hýsti Tónskóla þjóðkirkjunnar og Fjölskylduþjónustu kirkjunnar. Einnig var þess farið á leit við Hjálparstarf kirkjunnar að hjá þeim yrði vettvangur verkefnisins og starfið unnið undir merkjum þess. Skjólið er opið frá kl. 11 – 15 fimm daga vikunnar og veitir Rósa Björg Brynjarsdóttir Skjólinu forstöðu.
Samkiptamál
Samskiptamál hafa komið inn í starf biskupsstofu með miklum þunga undanfarin ár. Samskipti við þjóðina m.a. í gegnum fjölmiðla landsins eru mikilvægur þáttur til að efla traust til þjóðkirkjunnar og upplýsa um mikilvægt starf hennar.
Kirkjuvarpið er komið til að miðla þekkingu, boðun og köllun kirkjunnar til landsmanna. Hlaðvarpsveröld kirkjunnar er biðjandi, boðandi og þjónandi. Í hlaðvarpsveröld hennar er fjölbreytt efni og haldið verður áfram að auka við efnisúrval á komandi vetri af krafti.
Fréttabréf biskups Íslands hóf göngu sína síðasta vetur og verður framhald á. Þá mun nýtt app þjóðkirkjunnar líta dagsins ljós á haustmánuðum. Því er m.a. ætlað að halda skipulega utan um víðfeðma dagskrá kirkjunnar um land allt. Leiðbeina fólki hvar næsta kirkja er, leiðin að henni og hvar áhugaverða dagskrá er að finna miðað við þarfir og áhugasvið, svo eitthvað sé nefnt. Kirkjan er í sókn!
Samskiptamál, markaðsmál og ímyndarmál hafa eflst og munu halda áfram að eflast í breyttri veröld sem kallar á þjóðkirkju á frjálsum markaði trúar og lífsskoðanna. Þjóðkirkjan hefur einstakt erindi – það vitum við öll. Nú er lag á að láta það heyrast sem víðast.
Stefnumótunarvinna
Þegar farið
er inn á heimasíðu þjóðkirkjunnar blasir við glaðleg mynd hvar á stendur
Stefnumótun þjóðkirkjunnar og í blöðrum fyrir ofan fólkið sem prýðir myndina
eru setningar sem minna á hlutverk og þjónustu kirkjunnar. Ein þeirra er “Öflugt æskulýðsstarf byggir
framtíð kirkjunnar.” Æskulýðsstarfið er
eitt þeirra mála sem 96 manna fundur þjóðkirkjufólks vildi sjá sem áherslumál
þjóðkirkjunnar. Það er brýnt að hjálpa
söfnuðum til að efla barna- og æskulýðsstarf.
Það er meðal annars gert með leiðtogaþjálfun. Leiðtogaskóli þjóðkirkjunnar útskrifar árlega
15-20 ungmenni. Unglingarnir hittast í
tvo vetur á um þriggja vikna fresti og er námsefni af ýmsum toga. Biblíusögur
eru kenndar, frætt er um kristið gildismat, rætt um hlutverk leiðtoga sem
fyrirmynda. Þá er farið yfir ýmsar reglur kirkjunnar eins og siðareglur vígðra
sem óvígðra þjóna kirkjunnar. Lögð er áhersla á jákvæðni, vináttu og traust.
Einnig er farið í ýmsa leiki sem margt má læra af.
Kirkjuþing
unga fólksins er vettvangur ungs fólks til áhrifa í kirkjunni. Það er haldið ár hvert og er hlutverk þess að ræða
stöðu og hlutverk ungs fólks í þjóðkirkjunni og í samfélagi kirkna um heim
allan. Á
kirkjuþingi 2017 var samþykkt þingsályktun um hlutdeild unga fólksins í kirkjustarfi. Þingið
ályktaði að fylgja skuli eftir, hvað íslensku þjóðkirkjuna varðar, ályktun
tólfta þings Lúterska heimssambandsins frá árinu 2017 um þátttöku unga fólksins
í stjórn aðildarkirkna sambandsins. Miða skal við að ungt fólk, þ.e. sem er á
aldrinum sextán til þrjátíu ára, sé að jafnaði minnst tuttugu hundraðshlutar
þeirra innan hverrar skipulagsheildar þjóðkirkjunnar sem hverju sinni taka
bindandi ákvarðanir, semja áætlanir, skipuleggja starfsemi og hafa
kosningarétt. Verði því eigi við komið að tryggja hlutdeild unga fólksins
samkvæmt framanskráðu skal veita fulltrúum þess eðlilegan rétt til áheyrnar,
málfrelsis og framlagningar tillagna. Kirkjuþingið beindi því til biskups Íslands, forsætisnefndar
kirkjuþings og kirkjuráðs að fara yfir eigið skipulag og starfsemi, svo og nefndarskipan
til að ná þessum markmiðum.
Á næsta ári verður kosið til kirkjuþings næstu
fjögurra ára og hvet ég presta og djákna til að benda ungu fólki á að gefa kost
á sér til setu á kirkjuþingi. Jafnframt
bið ég presta og djákna að vekja áhuga öflugs kirkjufólks á öllum aldri í sínu
nærumhverfi á kirkjuþinginu sem nú hefur fengið meiri ábyrgð og fleiri verkefni
en áður.
Handbókin
Í þessum
mánuði fékk ég afhent handbókarefni úr fórum Helgisiðanefndar og
Handbókarnefndar sem unnið hafði verið á 20 ára tímabili 2000 – 2020. Í samþykktum um innri málefni þjóðkirkjunnar
segir um hlutverk handbókarinnar: “Handbók kirkjunnar er einingarband og
vitnisburður um samstöðu í tjáningu trúar og siðar á grundvelli játninga
evangelísk-lúterskrar kirkju. Handbók kirkjunnar veitir leiðbeiningar um
guðsþjónustu og helgihald. Messan og helgiathafnir kirkjunnar endurspegla í
senn hefð kirkjunnar og endurnýjuð form sameiginlegrar tilbeiðslu almennrar
kirkju.” Í þeim segir einnig: “Prestar
skulu að jafnaði fylgja textaröðum kirkjuársins samkvæmt Handbók kirkjunnar í
þeirri röð sem biskup Íslands mælir fyrir um.”
Það
gefur augaleið að á tuttugu ára ferli hefur verið unnið mikið og þarft
verk. Formaður handbókarnefndar Kristján
Valur Ingólfsson fyrrum vígslubiskup í Skálholti hefur haldið utan um vinnu
handbókarnefndar síðast liðin ár. Hann hefur nú sett skjalið inn á vefsíðu og í
dag sent ykkur slóð á efnið, ásamt
leiðbeiningum um hvernig og hvar skuli koma á framfæri athugasemdum.
Mörg eru álitamálin sem helgisiðanefnd og
handbókarnefnd undirnefnd hennar hefur fjallað um. Þau eiga við um form athafnanna og eins um
atriði á borð við tvítölu-fleirtölu (við-vér, okkur-oss, okkar-vor) og tungutak
beggja kynja o.s.frv. Eins voru períkópurnar sérstakt vandamál og var ákveðið
að skipa sérstaka períkópunefnd sem hefur skilað þremur endurskoðuðum
textaröðum sem nú þegar má finna á heimasíðu kirkjunnar. Það þarf að bera upp á prestastefnunni
handbókina þegar teknar hafa verið til greina athugasemdir ykkar en það verður
ekki gert á þessu ári heldur á prestastefnu á næsta ári sem vonandi getur farið
fram með hefðbundnum hætti. Hins vegar
verða períkópurnar bornar upp við slit þessarar prestastefnu sem væntanlega
verður í nóvember næstkomandi.
Vísitasíur
Kórónaveirufaraldurinn setti strik í reikninginn
við vísitasíur síðasta eina og hálfa árið.
Hlé var gert á yfirstandandi vísitasíu í Vesturlandsprófastsdæmi í mars
2020 en var fram haldið í byrjun júní á þessu ári. Enn á ég þó eftir að vísitera sóknir og
söfnuði í Dalaprestakalli. Vísitasíu í
Húnavatns- og Skagafjarðarprófastsdæmi sem stóð yfir árið 2018 lauk ekki fyrr
en í júní á þessu ári. Vil ég þakka
próföstum, prestum, djáknum og öðru kirkjufólki fyrir þeirra framlag, þjónustu
og góðar móttökur.
Nokkuð hefur verið um það að erfitt hefur verið
að ná í presta til þjónustu á sumarleyfistímanum. Borið hefur á að sumarleyfi nágrannapresta
hafi verið tekin á sama tíma. Vil ég
hvetja prófasta til að tryggja örugga prestsþjónustu á sínum svæðum og
jafnframt hvetja þá presta sem ekki eru bundnir af því að taka sumarleyfin yfir
hásumarið að horfa til annara tímabila ársins verði því við komið. Bið ég ykkur um að hafa þetta í huga í
framtíðinni.
Trú fyrir jörðina
Umhverfisstarf þjóðkirkjunnar hefur verið
umtalsvert undanfarin ár. Kirkjuþing
2019 samþykkti þrjár þingsályktanir um umhverfismál. Um úttekt á prestssetra-og kirkjujörðum vegna
endurheimtar votlendis og skógræktar, um orkuskipti í samgöngum á vegum starfsfólks
kirkjunnar og um kolefnisjöfnun ferðalaga á vegum kirkjustjórnarinnar. Þetta eru allt verðug verkefni sem hefur
verið unnið með og í frá kirkjuþinginu 2019.
Sífellt fleiri söfnuðir eru á grænni leið og nú
þegar hafa 19 söfnuðir fengið titilinn grænn söfnuður.
Tvær ráðstefnur hafa verið haldnar í Skálholti í
aðdraganda norðurslóðaráðstefnunnar Artic circle. Sú fyrri sem haldin var í október 2019 bar
yfrskriftina Trú í þágu jarðar. Biskupar
og aðrir trúarleiðtogar frá Norðurlöndum, Bandaríkjunum og Kanada áttu fund með
fræðimönnum, listamönnum og aðgerðarsinnum í loftslagsmálum ásamt fulltrúum frá
umhverfissamtökum. Á ráðstefnunni var ræddur þáttur trúar, andlegra
viðhorfa og trúarlegrar sannfæringar í að takast á við loftslagsvá og hnignun
vistkerfa.
Í fyrra var svo haldin Alheimsráðstefnan Faith
for Nature – Multi-Faith Action/ Trú fyrir jörðina – Fjöltrúarlegar
aðgerðir. Vegna heimsfaraldursins var
brugðið á það ráð að hafa ráðstefnuna í streymi og var hún haldin í Skálholti
og streymt þaðan út um víða veröld. Á
fimmta hundrað einstaklingar frá 58 löndum skráðu sig til beinnar þátttöku í
ráðstefnunni en óbeinir þátttakendur voru fleiri. Á meðal þeirra voru shamanar
frá Kanada og Grænlandi; biskupar af Norðurlöndunum og frá Norður- Ameríku, Bosníu
Hersegóvínu, Filipseyjum, Vatíkaninu, Kenía; leiðtogar pygmía frá Austur-Kongó
og frumbyggja í Amazon-skóginum; imam frá Nígeríu og íslamskir fræðimenn frá
Katar; kennari frá sjálfbærnisþorpi í Indlandi og prófessorar úr Evrópu og frá
Bandaríkjunum.
Trúarsamfélög um heim allan eru mikilvægir
gerendur í þeirri djúpstæðu umbreytingu sem verða þarf til þess að forða
yfirvofandi loftslagsvá og mæta öðrum áskorunum í umhverfismálum. Andleg gildi
móta lífshætti meira en 80% jarðarbúa. Meira en helmingur allra skóla í
heiminum er rekinn af trúfélögum. Til samans framleiða trúfélög fleiri rit og
bækur en nokkur annar aðili og teljast þriðji stærsti hópur fjárfesta í
heiminum.
Markmið ráðstefnunnar var að sameina ólíkar
trúarstofnanir, lífskoðunarfélög og trúarbrögð um heim allan til aðgerða sem
tryggt geta heimsmarkmiðum Sameinuðu þjóðanna framgang. Stofnun bandalags um
trú í þágu jarðar innan vébanda Umhverfisstofnunar Sameinuðu þjóðanna (e. Faith
for Earth Coalition) var meðal umfjöllunarefna á ráðstefnunni.
Umhverfisstofnun Sameinuðu þjóðanna lýsti viðburðinum sem sögulegum. Fyrirhugað var að kynna ályktun ráðstefnunnar
á umhverfisþingi Sameinuðu þjóðanna, sem halda átti í febrúar í ár en þinginu
var frestað vegna heimsfaraldursins.
Einnig minni ég á komandi Tímabil
sköpunarverksins sem þið hafið fengið upplýsingar um í bréfi sem sent var
nýlega og hvet ég ykkur til að þakka fyrir grósku sumarsins og lofa gjafir
jarðar í uppskerumessum nú í september.
Vígslur og tilfærslur
Frá því síðasta prestastefna var haldin fyrir
rúmum tveimur árum hafa þessir prestar
hlotið vígslu:
Mag. Theol. Jónína
Ólafsdóttir var vígð 11. ágúst 2019 til þjónustu sem prestur í
Dalvíkurprestakalli, Eyjafjarðar- og Þingeyjarprófastsdæmi.
Mag. Theol. Helga
Kolbeinsdóttir var vígð 25. ágúst 2019 til þjónustu sem prestur í
Digranesprestakalli í Reykjavíkurprófastsdæmi eystra.
Mag. Theol. Jarþrúður
Árnadóttir var vígð 15. september 2019 til þjónustu sem prestur í Langanes- og
Skinnastaðarprestakalli frá 1. september 2019.
Mag. Theol. Alfreð Örn
Finnsson var vígður 15. september 2019 til þjónustu sem prestur í Austfjarðaprestakalli
með aðsetur á Djúpavogi, Austurlandsprófastsdæmi frá 1. nóvember 2019.
Mag. Theol. Benjamín
Hrafn Böðvarsson var vígður 15. september 2019 til þjónustu sem prestur í
Austfjarðaprestakalli, Austurlandsprófastsdæmi frá 1. október 2019.
Mag. Theol. Dagur Fannar
Magnússon var vígður 15. september 2019 til þjónustu sem prestur í
Austfjarðaprestakalli með aðsetur í Heydölum, Austurlandsprófastsdæmi frá 1.
nóvember 2019.
Mag. Theol. Aldís Rut
Gísladóttir var vígð 22. september 2019 til þjónustu sem prestur í
Langholtsprestakalli í Reykjavíkurprófastsdæmi vestra frá 1. september 2019.
Cand. Theol. Bryndís
Svavarsdóttir var vígð 17. nóvember 2019 til þjónustu sem prestur í
Patreksfjarðarprestakalli í Vestfjarðaprófastsdæmi.
Mag. Theol. María
Gunnarsdóttir var vígð 17. nóvember 2019 til þjónustu sem sóknarprestur í
Laufásprestakalli í Eyjafjarðar- og Þingeyjarprófastsdæmi.
Mag. Theol. Ingimar
Helgason var vígður 17. nóvember 2019 til þjónustu sem sóknarprestur í
Kirkjubæjarklaustursprestakalli í Suðurprófastsdæmi frá 15. nóvember 2019.
Mag. Theol. Sindri Geir
Óskarsson, var vígður 1. desember 2019 til þjónustu sem héraðsprestur í
Eyjafjarðar- og Þingeyjarprófastsdæmi.
Mag. Theol. Þóra Björg
Sigurðardóttir, var vígð 1. mars 2020 til þjónustu sem prestur í Garða- og Saurbæjarprestakalli frá 1. apríl
2020.
Mag. Theol. Pétur
Ragnhildarson, var vígður 1. mars 2020 til þjónustu sem prestur í
Guðríðarkirkju og Fella- og Hólakirkju í Reykjavíkurprófastsdæmi eystra.
Mag. theol. Guðrún
Eggerts Þórudóttir var vígð 27. september 2020, til þjónustu sem sóknarprestur
við Ólafsfjarðarprestakall í Eyjafjarðar- og Þingeyjarprófastsdæmi.
Mag. theol. Margrét
Lilja Vilmundardóttir var vígð 7. mars 2021, til þjónustu sem prestur við
Fríkirkjuna í Hafnarfirði.
Mag. theol. Sigurður Már
Hannesson var vígður 7. mars 2021, til þjónustu sem prestur við Kristilegu
skólahreyfinguna.
Mag. theol. Snævar Jón
Andrésson var vígður 2. maí 2021 til þjónustu sem sóknarprestur í
Dalaprestakalli í Vesturlandsprófastsdæmi.
Frá síðustu prestastefnu
hafa þessir djáknar hlotið vígslu:
Daníel Ágúst Gautason
var vígður 15. september 2019 til þjónustu sem djákni í Grensássókn,
Fossvogsprestakalli í Reykjavíkurprófastsdæmi
vestra.
Steinunn Þorbergsdóttir
var vígð 15. september 2019 til þjónustu sem djákni í Breiðholtsprestakalli í
Reykjavíkurprófastsdæmi eystra.
Anna Hulda Júlíusdóttir
var vígð 1. mars 2020 til þjónustu sem djákni í Eldriborgararáði í Reykjavíkurprófastsdæmi
vestra og eystra.
Jóhanna María
Eyjólfsdóttir var vígð 1. mars 2020 til þjónustu sem djákni í Áskirkju í
Reykjavíkurprófastsdæmi vestra.
Skipanir í embætti
Við sameiningu prestakalla voru skipuð í embætti
Séra Pálmi Matthíasson, sóknarprestur í
Bústaðaprestakalli. Hann var skipaður
sóknarprestur í Fossvogsprestakall í Reykjavíkurprófastsdæmi vestra frá 1. júní
2019.
Séra Jón Ármann Gíslason, sóknarprestur í
Skinnastaðaprestakalli, var skipaður sóknarprestur í Langanes – og
Skinnastaðaprestakalli við sameiningu þeirra prestakalla frá 1. júní 2019.
Séra Jóna Kristín Þorvaldsdóttir, sóknarprestur
í Kolfreyjustaðarprestakalli, var við sameiningu Djúpavogs-, Eskifjarðar-,
Heydala-, Norðfjarðar- og Kolfreyjustaðarprestakalla skipaður sóknarprestur í
Austfjarðaprestakalli, Austurlandsprófastsdæmi frá 1. september 2019.
Aðrar skiparnir eru:
Séra Erla Björk Jónsdóttir, héraðsprestur í
Austurlandsprófastsdæmi var skipuð prestur í Austfjarðaprestakalli í
Austurlandsprófastsdæmi frá 1. september 2019.
Séra Þráinn Haraldsson, prestur í Garða- og
Hvalfjarðarstrandarprestakalli var skipaður sóknarprestur í sama prestakalli
frá 1. september 2019.
Séra Magnús Björn Björnsson, prestur í
Digranesprestakalli var skipaður sóknarprestur í Breiðholtsprestakalli í
Reykjavíkurprófastsdæmi eystra frá 16. september 2019.
Við sameiningu Breiðholtsprestakalls og Fella-
og Hólaprestakalls þann 22. nóvember 2019 varð séra Magnús Björn prestur í hinu
sameinaða Breiðholtsprestakalli.
Séra Eva Björk Valdimarsdóttir, héraðsprestur í
Reykjavíkurprófastsdæmi vestra var skipuð prestur í Fossvogsprestakalli í
Reykjavíkurprófastsdæmi vestra frá 1. október 2019.
Séra María Ágústsdóttir, héraðsprestur í
Reykjavíkurprófastsdæmi vestra var skipuð prestur í Fossvogsprestakalli, frá 1.
október 2019.
Séra Gunnar Einar Steingrímsson var skipaður sóknarprestur
í Laufásprestakalli í Eyjafjarðar- og Þingeyjarprófastsdæmi frá 1. nóvember
2019.
Séra Ninna Sif Svavarsdóttir, prestur í
Selfossprestakalli var skipuð sóknarprestur í Hveragerðisprestakalli í
Suðurprófastsdæmi frá 1. desember 2019.
Þann 1. janúar árið 2020 breyttust reglur þannig
að nú er ráðið í stöður. Eftirfarandi voru ráðin:
Séra Helga Kolbeinsdóttir, settur prestur í
Digranes- og Hjallasóknum var ráðin
prestur í Digranesprestakalli í
Reykjavíkurprófastsdæmi eystra frá 1. janúar 2020.
Séra Arnaldur Arnold Bárðarson, settur
sóknarprestur í Eyrarbakkaprestakalli var ráðinn sóknarprestur í
Eyrarbakkaprestakalli í Suðurprófastsdæmi frá 1. febrúar 2020.
Séra Sigrún Óskarsdóttir var ráðin fangaprestur þjóðkirkjunnar
frá 1. mars 2020.
Séra Sindri Geir Óskarsson, settur héraðsprestur
í Eyjafjarðar- og Þingeyjarprófastsdæmi
var ráðinn sóknarprestur í Glerárprestakalli í Eyjafjarðar- og
Þingeyjarprófastsdæmi frá 9. mars 2020.
Séra Gunnar Jóhannesson, settur sóknarprestur í
Þorlákshafnarprestakalli í Suðurprófastsdæmi var ráðinn prestur í
Selfossprestakalli í sama prófastsdæmi frá 1. apríl 2020.
Séra Jónína Ólafsdóttir, settur sóknarprestur í
Dalvíkurprestakalli var ráðin prestur í
Garða- og Saurbæjarprestakall í Vesturlandsprófastsdæmi frá 1. apríl 2020.
Séra Jóhanna Gísladóttir, settur sóknarprestur í
Laugarlandsprestakalli í Eyjafjarðar- og Þingeyjarprófastsdæmi var ráðin
sóknarprestur í sama prestakalli frá 1. apríl 2020.
Séra Sigríður Munda Jónsdóttir, sóknarprestur í
Ólafsfjarðarprestakalli var ráðin sóknarprestur í Þorlákshafnarprestakall í
Suðurprófastsdæmi frá 1. maí 2020.
Séra Jón Ásgeir Sigurvinsson var ráðinn
héraðsprestur í Reykjavíkurprófastsdæmi vestra frá 1. júní 2020.
Séra Sigfús Kristjánsson, verkefnastjóri á Biskupsstofu, var ráðinn
prestur Íslendinga í Danmörku frá 1. ágúst 2020.
Séra Sigríður Kristín Helgadóttir var ráðin sóknarprestur í
Breiðabólstaðarprestakalli í Suðurprófastsdæmi, frá 1. september 2020.
Séra Jónína Ólafsdóttir, prestur í Garða og Saurbæjarprestakalli,
Vesturlandsprófastsdæmi, var ráðin sóknarprestur í Hafnarfjarðarprestakalli í
Kjalarnessprófastsdæmi, frá 1. desember 2020.
Séra Hans Guðberg Alfreðsson prestur í
Garðaprestakalli, Kjalarnessprófastsdæmi var útnefndur prófastur í
Kjalarnessprófastsdæmi frá 1. desember 2020.
Lausn frá embætti
Nokkrir prestar fengu lausn frá embætti frá
síðustu prestastefnu.
Séra Elín Salóme Guðmundsdóttir, fékk lausn frá
embætti prests í Patreksfjarðarprestakalli, Vestfjarðaprófastsdæmi frá 1. júlí
2019.
Séra Bolli Pétur Bollason, fékk lausn frá
embætti sóknarprests í Laufásprestakalli Eyjafjarðar-og Þingeyjarprófastsdæmi
frá 1. september 2019.
Séra Ingólfur Hartvigsson, fékk lausn frá
embætti sóknarprests í Kirkjubæjarklaustursprestakalli, Suðurprófastsdæmi frá
1. september 2019.
Séra Gunnlaugur Stefánsson, fékk lausn frá
embætti sóknarprests í Heydalaprestakalli, Austurlandsprófastsdæmi frá 1.
nóvember 2019.
Séra Sjöfn Jóhannesdóttir, fékk lausn frá
embætti sóknarprests í Djúpavogsprestakalli, Austurlandsprófastsdæmi frá 1.
nóvember 2019.
Séra Sigurður Rúnar Ragnarsson, fékk lausn frá
embætti sóknarprests í Norðfjarðarprestakalli, Austurlandsprófastsdæmi frá 1.
nóvember 2019.
Séra Flóki Kristinsson, fékk lausn frá embætti
sóknarprests í Hvanneyrarprestakalli, Vesturlandsprófastsdæmi frá 1. júní 2020.
Sr. Gunnlaugur Garðarsson fékk lausn frá embætti
sóknarprests í Glerárprestakalli, Eyjafjarðar- og Þingeyjarprófastsdæmi frá 31.
janúar 2020.
Sr. Önundur Björnsson fékk lausn frá embætti
sóknarprests í Breiðabólstaðaprestakalli, Suðurprófastsdæmi, frá 31. júlí
2020.
Sr. Þórhildur Ólafs fékk lausn frá embætti
prests í Hafnarfjarðarprestakalli, Kjalarnessprófastsdæmi frá 30. nóvember
2020.
Sr. Geir Waage fékk lausn frá embætti
sóknarprests í Reykholtsprestakalli, Vesturlandsprófastsdæmi, frá 31. desember
2020.
Andlát
Frá síðustu prestastefnu hafa þessi kvatt:
Séra Ólafur Jens Sigurðsson, fyrrum
sóknarprestur í Ingjaldshólsprestakalli Vesturlandsprófastsdæmi, lést 11. júní
2019.
Séra Ólöf Ólafsdóttir, fyrrum prestur á
hjúkrunar- og dvalarheimilinu Skjóli, lést 10. júlí 2019.
Sr. Ingþór Indriðason Ísfeld, fyrrum prestur
Íslendinga í Vesturheimi lést 8. júlí 2020.
Séra Stefán Lárusson, fyrrum sóknarprestur í
Oddaprestakalli, Suðurprófastsdæmi, lést 25. janúar 2020.
Séra Einar Guðni Jónsson, fyrrum sóknarprestur í
Kálfafellsstaðarprestakall, Suðurprófastsdæmi, lést 4. apríl 2020.
Séra Elín Salóme Guðmundsdóttir prestur í Patreksfjarðarprestakalli
Vestfjarðaprófastsdæmi lést 14. ágúst 2020.
Séra Egill Hallgrímsson sóknarprestur í
Skálholtsprestakalli, Suðurprófastsdæmi, lést 9. júní 2021.
Séra Sigurjón Einarsson, fyrrum prófastur í Skaftafellsprófastsdæmi og sóknarprestur í Kirkjubæjarklaustursprestakalli, lést 23. júlí 2021.
Guðrún Kristín
Þórsdóttir, djákni, lést 11. maí 2021.
Frú Sumarrós Lillian Eyfjörð Garðarsdóttir,
ekkja séra Birgis Snæbjörnssonar, fyrrum sóknarprests í Akureyrarprestakalli og
prófasts í Eyjafjarðarprófastsdæmi, lést 11. nóvember 2019.
Frú Katrín Eyjólfsdóttir, ekkja sr. Braga Friðrikssonar, fyrrum sóknarprests í Garðaprestakalli og prófasts í Kjalarnesprófastsdæmi, lést 4. júní 2021.
Frú Ingibjörg Sigurðardóttir ekkja sr. Eggerts
Ólafssonar, fyrrum sóknarprests í Kvennabrekkuprestakalli og prófasts í
Dalaprófastsdæmi, lést 28. júlí 2021.
Frú Margrét Hagalínsdóttir, ekkja sr. Sigurðar
Kristjánssonar fyrrum sóknarprests í Ísafjarðarprestakalli og prófasts í Ísafjarðarprófastsdæmi
, lést 17. júlí 2021.
Við þökkum Guði fyrir trúa þjónstu þeirra í
kirkju Krists og biðjum Guð að helga minningu þeirra og blessa ástvini þeirra.
Lútum höfðum í hljóðri bæn.
Nýtt umhverfi
Þjóðkirkjan gengur nú í
gegnum miklar breytingar hvað skipulag varðar.
Prestaköllin hafa stækkað, samvinna aukist, embættismenn ríkisins
horfið, ráðningartími presta ekki bundinn við ákveðinn árafjölda, samið um kaup
og kjör, tekist á við fjárlagahalla og breytt viðhorf til margra hluta. Margt brennur á prestum og djáknum og
sóknarnefndir glíma við skert framlag til sóknanna. Margrar spurningar eru fram bornar en svörin
ekki alltaf á reiðum höndum. Við bætum
vonandi úr því á fundum okkar í prófastsdæmunum.
Það sem mestu máli
skiptir er þó erindi kirkjunnar okkar sem sífellt er nýtt og færir okkur birtu
og von. Við skulum ekki missa sjónar á
því erindi sem okkur er falið að koma á framfæri hér í heimi. Það er frumskylda okkar og aðalatriði hvað
sem skipulagi, stefnumótun, fjármálum og öðru veraldarvafstri við kemur.
Ég þakka
ykkur trúa þjónustu í kirkju Krists og bið Guð að gefa ykkur kraft og djörfung
til góðra verka.
Göngum með
gleði til samtals á þessari prestastefnu þó hún fari fram með óvenjulegum
hætti. Göngum með gleði til
þjónustunnar í kirkju Krists.
Bræður og
systur. Megi vinátta okkar styrkjast og
samheldni okkar aukast.
Prestastefna Íslands árið 2021 er sett.
