Nú er alþjóðleg samkirkjuleg bænavika nýafstaðin. Af því tilefni er gott að leiða hugann að samkirkjulegi starfi yfirleitt. Mikilvægi þess er óumdeilt, enda sagði Jesús að kristið fólk ætti að vera eitt í samfélaginu við sig. Samkirkjulega bænavikan er góður vettvangur til þess að stuðla að þessari einingu. Við það tækifæri sameinast kristið fólk í bæn og beiðni ásamt þakkargjörð. Það finnur fyrir þessari samsemd þrátt fyrir að tilheyra mismunandi kirkjudeildum, sem hver hefur sínar áherslur. Samsemdin birtist í samfélaginu sem fólkið á við hvert annað í tilbeiðslunni. Á heilagri bænastund skiptir ekki máli hvaða kirkjudeild við tilheyrum. Aðalatriðið er að eiga trú á Jesú Krist, krossfestan og upprisinn.
Jesús sagði, að í húsi föður hans væru margar vistarverur. Hann sagði aldrei að við ættum að vera nákvæmlega eins í tjáningu trúar okkar. Við erum ólík og einnig trúartjáning okkar. Í þessu sambandi hefur kirkjudeildunum stundum verið líkt við akreinar á vegi. Þessar akreinar liggja hlið við hlið. Allar mynda þær sameiginlega þennan veg sem liggur til eilífa lífsins. Samræður og samstarf á milli kirkjudeildanna hafa verið í gangi áratugum saman. Þjóðkirkjan hefur tekið virkan þátt í þessu starfi. Hún er þátttakandi í Alkirkjuráðinu og Lútherska heimsambandinu. Þá starfar hún náið með anglíkönskum söfnuðum bæði í Evrópu og Norður-Ameríku.
Það er gríðarlega mikilvægt að kristið fólk snúi bökum saman á okkar tímum. Þar er bænin grundvallaratriði. Hún sameinar kristið fólk um víða veröld. Hún er stórkostlegt tæki sem Guð hefur gefið okkur, enda er hún oft nefnd andardráttur trúarinnar.
Í síðustu viku átti ég þess kost að taka þátt í samkirkjulegum alþjóðlegum biblíuleshópi í Reykjavík. Það var ánægjuleg reynsla. Í hópnum eru háskólanemar frá Bandaríkjunum, Kanada, Englandi og Þýskalandi. Þeir eru meðlimir fimm mismunandi kirkjudeilda, en allir voru þeir eitt í samfélaginu við Jesú Krist. Þetta er samkirkjulegt starf eins og það gerist best. Ungt fólk sem lætur ekki mismunandi guðfræðilegrar kennisetningar trufla sig. Í þessum biblíuleshópi eru þau samhuga í trúnni á Jesú Krist, sem er líka það sem skiptir öllu máli.
