Sálmabók

1 Lát þennan dag, vor Drottinn, nú
oss dýran ávöxt færa.
Ó, besti faðir, blessa þú
vorn barnahópinn kæra.
Nú frammi fyrir þér,
vor faðir, stöndum vér,
þín eldri' og yngri börn,
þín elska líknargjörn
vor hjörtu virðist hræra.

2 Og hversu langt sem lætur þú
þau lífsins strauma bera
lát helga skírn og hreina trú
þeim hjartans akker vera.
Ó, hversu sæll er sá
er segja' í trúnni má:
Minn Guð ei gleymir mér,
minn Guð mér faðir er,
mig hann mun hólpinn gera.