Sálmabók

1 Lof sé þér, Guð, fyrir' allt sem er,
einkum þá sól er lýsir hér,
hallelúja, hallelúja.
Systir sú blessuð, björt og hlý,
brosir hvern morgun söm og ný.
Þökkum Drottins dásemd alla.
Hallelúja, hallelúja, hallelúja.

2 Dagurinn heilsar hýr og er
hverjum sem vaknar mynd af þér,
hallelúja, hallelúja.
Húmið kemur með hvíld og frið,
helgaðar náðir barm þinn við.
Þökkum Drottins dásemd ...

3 Stjörnunnar blik er bros frá þér,
bróðir og vinur máninn er,
hallelúja, hallelúja.
Vindar sem strjúka vanga manns
vilja tjá þína ást til hans.
Þökkum Drottins dásemd ...

4 Vatnalindir með ljúfum klið
leika og hjala manninn við,
hallelúja, hallelúja.
Eins færa grös og anganblóm
ilman frá þínum helgidóm.
Þökkum Drottins dásemd ...

5 Næturnar hvísla: Hér er bjart,
himinn Guðs lýsir myrkrið svart,
hallelúja, hallelúja.
Loginn á arni, ljósið hvert,
lýsir af þér sem Drottinn ert.
Þökkum Drottins dásemd ...

6 Móðirin jörð með sárin sín
seður og gleður börnin þín,
hallelúja, hallelúja.
Þrátt fyrir mannsins blóðgu braut
blessar þú hennar móðurskaut.
Þökkum Drottins dásemd ...

7 Lof fyrir hverja hlýja sál,
helgaða breytni, verk og mál,
hallelúja, hallelúja,
alla sem láta ljósið þitt
leiða viljann og hjartað sitt.
Þökkum Drottins dásemd ...

8 Lof sé þér, Guð, fyrir' lífsins gjöf,
ljósið þitt slökkvir engin gröf,
hallelúja, hallelúja.
Dauðinn birtist sem bróðir manns
bjartur af sigri frelsarans.
Þökkum Drottins dásemd ...