Alþjóðlegur bænadagur kvenna er föstudaginn 2. mars nk. Efni bænadags kvenna kemur að þessu sinni frá Suður-Ameríkulýðveldinu Súrínam. Er fjallað um umhverfisvernd undir yfirskriftinni „Öll sköpun Guðs er harla góð“. Bænasamverur verða haldnar víða um land. Samkoman á höfuðborgarsvæðinu verður haldin í Íslensku Kristskirkjunni, Fossaleyni 14, og hefst kl. 20. Mikill söngur og hlýlegt andrúmsloft. Kvennakór KFUK, Ljósbrot, syngur undir stjórn og undirleik Keith Reed. Í Vestmannaeyjum hittist fólk kl. 16.30 við Ráðhús/safnahús í hjarta bæjarins og þaðan verður farið í bænagöngu. Kl. 17.15 er síðan samverustund í Landakirkju. Á Egilsstöðum verður helgistund kl. 17 í safnaðarheimilinu, Hörgsási 4. Í Miðfirði hefst samveran í safnaðarheimilinu á Melstað þar sem sýndar verða myndir og súrínamskur matur boðinn til smökkunar og síðan er haldið til kirkju. Þið eruð öll velkomin á þessar samveru- og bænastundir.