Snör handtök söngmálastjóra

21. maí 2019

Snör handtök söngmálastjóra

Margrét Bóasdóttir

Söngmálastjóri þjóðkirkjunnar, Margrét Bóasdóttir, hefur í mörgu að snúast.

Fyrir nokkru kom hún með Kvennakór Háskóla Íslands í Hólmsheiðarfangelsið. Sungu þær falleg lög fyrir fangana og vöktu mikla hrifningu og þakklæti.

Þegar Margrét sá að ekkert hljóðfæri var í eigu fangelsisins sagði hún strax ákveðið að úr þessu þyrfti að bæta. Svona gengi þetta ekki.

Nokkru síðar hafði hún samband og sagðist geta útvegað píanó úr dánarbúi nokkru. Þyrfti aðeins nokkra fílhrausta menn til að flytja það ofan af fjórðu hæð og í Hólmsheiðina. Fyrir þetta var þakkað og píanóið sótt við fyrsta tækifæri. Nú sómir það sér vel í Hólmsheiðarfangelsinu og þökk sé söngmálastjóra þjóðkirkjunnar fyrir ötula og snara framgöngu.

Píanóið er danskt, frá firmanu Herm. N. Petersen & Søn, og er frá 1845. Fallegur gripur og traustur. Margir snillingar ku hafa leikið á það.

Það mun koma sér vel þegar helgar stundir eru hafðar um hönd í fangelsinu og eins þá kórar og aðrir listamenn koma í heimsóknir.

Fangelsisyfirvöld flytja söngmálastjóra kærar þakkir fyrir vasklega framgöngu í þágu fangelsisins og listarinnar.

Þess má geta að píanó í eigu Kvíabryggjufangelsisins kom þangað fyrir tilstilli fyrrum söngmálastjóra, Hauks Guðlaugssonar. Píanóið á Litla-Hrauni kom þangað fyrir milligöngu sr. Gunnars Björnssonar.

 

  • Frétt

  • Samfélag

  • Tónlist

  • Samfélag

Sölvi Hilmarsson og Eva Björk Kristborgardóttir standa vaktina
20
júl.

Þau standa vaktina

...villtur lax úr Hvítá og nýjar íslenskar kartöflur...
Dr. Munib Younan og sr. Kristján Björnsson, vígslubiskup
19
júl.

Málþing á morgun í Skálholti

...að leysa ágreining, koma á friði og vinna að sáttargjörð
Hellnakirkja - listsýning og viðgerð
19
júl.

Þegar kirkja gliðnar

...enginn sannkristinn maður vill að guðshúsið hlaupi út undan grunni sínum og í sjó fram.