Listrænn djákni

08. október 2019

Listrænn djákni

Hólmfríður og myndin: Kirkjuglugginn

Í fordyri Grensáskirkju er ágætt rými og þar eru oft haldnar myndlistarsýningar. Þar er nú sýning sem annar djáknanna í Fossvogsprestakalli stendur að – nánar til tekið er hún djákni í Bústaðasókn.

Hólmfríður Ólafsdóttir, djákni, er listræn kona og glaðlynd. Myndir hennar geisla af gleði og krafti, og margar eru af hestum enda er Hólmfríður hestakona.

Hún er fædd á Siglufirði, bjó þar til sextán ára aldurs. Hafði alltaf mikinn áhuga á öllu því er snerti myndlist. Í framhaldsskólanum á Sauðárkróki var það myndlistin sem dró hana til sín og hún lærði þar módelteikningu. Síðan fór siglfirska stúlkan í Iðnskólann og lærði klæðskurð. Það var aðalstarfi hennar í áratug.

En margt leitaði á huga stúlkunnar. Andlega hugsandi kona og hún hóf nám í djáknafræðum og lauk BA-prófi í þeim fræðum og sálgæslu árið 2010. Þremur árum síðar var hún ráðin sem djákni við Bústaðakirkju.

En myndlistin hefur sterk tök á henni. Hún fór í Myndlistarskólann í Kópavogi árið 2015. Hólmfríður hefur sýnt með samnemendum sínum og á Hótel Vos í Þykkvabænum.

Enginn sem á leið um Grensáskirkju ætti að láta þessa prýðilegu sýningu fram hjá sér fara. Hún stendur út októbermánuð og er opin á opnunartíma kirkjunnar.

Sjá nánar hér um Hólmfríði Ólafsdóttur.


  • Frétt

  • Menning

  • Samfélag

  • Trúin

  • Viðburður

  • Menning

  • Samfélag

Hluti áheyrenda - einbeittur svipur leynir sér ekki
25
jan.

Sóknarfæri kirkjunnar

Hvað er um tengsl trúar og íþrótta að segja?
Skálholtsdómkirkja og Þorláksbúð
24
jan.

Verndarsjóður og skólaráð

Í mörg horn að líta í Skálholti