Er einhver þarna úti?
Tölur segja marg og ýmislegt er hægt að lesa út úr þeimSvo sem kunnugt er hefur kirkjustarf leitað inn á brautir streymis á netinu þar sem fjöldatakmarkanir og nálægðarreglur hafa sett hefðbundið starf úr skorðum.
Fjöldi kirkna hefur streymt efni með ýmsu móti á netinu. Á Feisbók, heimasíðum, youtube og víðar. Segja má að gróska í kirkjunetstarfi hafi verið ótrúlega mikil. Þjóðkirkjan varð mjög sýnileg og brást við gerbreyttum aðstæðum með kröftugum hætti og ekki síst í ljósi þess að kirkja er samfélag fólks augliti til auglitis í raunheimum en skyndilega voru þau tengsl rofin að mestu og samfélaginu vísað í netheima.
En er hægt að gera sér einhverja mynd af því hvernig hið mikla streymi á kirkjuefni á síðasta ári hefur skilað sér?
Margrét Hannesdóttir, verkefnastjóri á Biskupsstofu, hefur skoðað þessi mál en það er nokkuð tímafrek vinna þar sem halda þarf utan um á annað þúsund færslur. Kirkjan.is ræddi við hana um málið.
Margrét tók saman upplýsingar um áhorf á myndbönd fyrir tvö tímabil: 13. mars 2020 -15. maí 2020 og 1. nóvember 2020-5. janúar 2021, sem sett voru á heimasíður og Feisbókarsíður prestakalla og kirkna.
Smám saman tóku prestaköllin við sér - góðir hlutir gerast líka hægt! Þátttaka í streymi var 67% á fyrra tímabilinu og fór upp í 92% um jólahátíðina – á seinna tímabilinu sem skoðað var. Bæði tímabilin voru auðvitað umgirt af kórónuveirukófi, fjöldatakmörkunum og nálægðartakmörkunum.
„Þetta var mikill fjöldi myndbanda og ef meðaltal er skoðað fyrir hefðbundinn mánuð sem stórhátíðir falla ekki inn í þá voru sendar út í hverjum mánuði um 140 helgistundir, 31 barnastund, 55 hugvekjur og 30 kyrrðar- og bænastundir. ,“ segir Margrét. Þess má geta að samtals eru sjötíu prestaköll í landinu.
Á aðfangadag voru áhorfin 1463 að meðaltali á hverja aðfangadagsstund sem 48 prestaköll birtu á netinu og mátti sjá í athugasemdum færslnanna við myndböndin á Feisbók að brottfluttir heimamenn voru ánægðir með að geta notið helgistundar í gömlu kirkjunni sinni.
En hvenær er áhorf mælt sem áhorf?
„Feisbók skráir áhorf eftir þrjár sekúndur og youtube eftir hálfa mínútu,“ segir Margrét. Í því geti margt falist og þar með að sjálfsögðu áhorf til enda. Sem fyrr skiptir mestu máli að ná athygli áhorfandans á fyrstu sekúndum og takist það er líklegra að hann horfi áfram og til enda. Þá bætir hún við að hvert myndband sé í raun og veru mjög góð auglýsing fyrir kirkjuna burtséð frá því hve lengi er horft á hvert og eitt þeirra.
„Nú, ef myndbandi er bústað eins og sagt er þá getur það náð allt í 100 þúsund áhorf,“ segir Margrét og nefnir sem dæmi hið vel heppnaða myndband Grafarvogskirkju.
Margrét nefnir líka að komið hafi á óvart hversu mikið áhorf hafi verið á myndbönd frá söfnuði innflytjenda en í honum eru innflytjendur sem helst kunni tungumálið farsi eða ensku. Myndbönd send frá söfnuðinum hafi náð til 5050 áhorfenda og eru margir í söfnuðinum frá löndum þar sem kristin trú er ekki ríkjandi og jafnvel ekki leyfð. Telur hún því þjóðkirkjuna vera að ná nokkuð vel til þessa hóps með þessum hætti.
Svokölluð jóladagatöl voru sýnd á aðventunni. Það voru sex prófastsdæmi sem sendu þau út eða átján prestaköll. Mælt heildaráhorf á þau var 169387 og að meðaltali sáu 921 hvert myndband. Mörg þessara jóladagatala fluttu örstutt viðtöl eða umfjöllun fólks úr grasrót kirkjunnar. Sum myndbandanna voru kirkjukynningar þar sem prestar og safnaðarfólk kom fram. Það var Kjalarnessprófastsdæmi sem skoraði hæst í áhorfi að meðaltali á hverja jóladagatalsstund en það var 2666.
Og meginniðurstaðan?
„Efnið sem söfnuðirnir setja á netið nær til fólksins. Starfsfólk kirkjunnar hefur verið að læra á þetta nýja form og átta sig á því hvernig það getur nýst okkur til að koma boðskapnum á framfæri. Þegar á heildina er litið þá hefur þjóðkirkjan brugðist við með myndarlegum hætti,“ segir Margrét. Hún bendir líka á að við streymisgerð hafi ólík prestaköll unnið saman sem og sóknir. „Mikill fjölbreytileiki hafi verið í helgihaldinu og framsetningu á efni,“ segir Margrét og nefnir í því sambandi samstarf Grensássóknar og Bústaðasóknar í Fossvogsprestakalli.
hsh
-----------------
Sr. Henning Emil Magnússon, prestur í Vídalínskirkju, kemur í þessu athyglisverða myndbandi inn á tengsl áhorfanda og prests:
