Þrjár fyrirspurnir voru lagðar fram á kirkjuþingi af sr. Hreini S. Hákonarsyni. Þeim svaraði sr. Agnes M. Sigurðardóttir, biskup.

1. Hvar er verkefnið „Ein saga – eitt skref statt“?
Þjóðkirkjan og Samtökin ´78 hófu samstarf um þetta verkefni með það í huga að gera upp og læra af sögu misréttis gagnvart hinsegin fólki í kirkjunni. Rætt var um að safna sögum frá fólki sem taldi sig orðið hafa fyrir fordómum og andstöðu þjóðkirkjunnar vegna kynhneigðar sinnar og réttindabaráttu vegna hneigðar sinnar. Sett var upp síða sem kölluð var sögusíða og gat fólk deilt þar sögum sínum. Síðan átti að birta þessar sögur í kirkjum landsins, eða hengja upp eins og kallað var, til vitnisburðar og lærdóms. Eftir því sem fyrirspyrjandi veit best hefur lítið til þessa verkefnis spurst og í ljósi þessi er fyrirspurn þessi sett fram.
Svar: Vinnan stendur enn yfir og miðar verkefninu vel áfram. Áætlað er að miðla sögunum á nýju ári. Söfnun er á lokametrum en gert er ráð fyrir að sögurnar veðri um 12 talsins.

2. Hvar er verkefnið „Skírnarskógur“ statt? Hvað hefur verið veitt miklu fjármagni í það?
Ágætri hugmynd um skírnarskóga var varpað upp fyrir nokkrum árum og vakti mikla og verðskulduga athygli. Rætt var um að planta trjám niður fyrir hvert skírt barn. Nákvæm framkvæmdaáætlun lá ekki fyrir hvernig staðið yrði að verk og því er spurt um þetta. Fyrirspyrjanda er kunnugt um skírnarskóginn í Skálholti en einnig var rætt um að skírnarskógar yrðu í öllum prófastsdæmum landsins eða sóknum.
Svar: Verkefnið skírnarskógar er farið af stað. Búið er að velja svæði auk þess sem fundir hafa átt sér stað með próföstum sem jafnframt fengu meðfylgjandi fylgigagn með ítarlegri lýsingu á verkefninu. Reiknað var með að prófastsdæmin önnuðust framkvæmdina í hverju prófastsdæmi en viðbrögð prófasta hafa verði dræm til þessa þó einstaka prófastar hafa lýst áhuga. Enn sem komið er hefur aðeins verið farið af stað í Skálholti, verkefnið fór af stað í fyrra og voru þá gróðursettar ca. 100 plöntur. Kostnaður hefur numið kr. 101.779.

3. Skipuð var nefnd til að athuga með framtíðarhúsnæði Biskupsstofu/Þjóðkirkju – hvað hefur hún haldið marga fundi og hverjar eru helstu hugmyndir hennar um húsnæði Biskupsstofu/Þjóðkirkjunnar? Er komin tímasetning á flutning?
Svar: Að tillögu forseta kirkjuráðs var á fyrri hluta árs 2021 skipaður fjögurra manna starfshópur til að ræða framtíðarhúsnæðismál yfirstjórnar kirkjunnar. Hópinn mynda auk biskups, forseti kirkjuþings, lögfræðingur kirkjuþings og framkvæmdastjóri kirkjuráðs. Hópurinn hefur rætt þessi mál og var ákveðið að kanna fyrst hvort finna mætti framtíðarhúsnæði fyrir yfirstjórnina í einhverri af kirkjubyggingum á höfuðborgarsvæðinu. Hópurinn hefur sérstaklega litið til Grensáskirkju (Háaleitisbraut 66, Reykjavík) þar sem þjóðkirkjan á nú þegar neðri hæð fasteignarinnar Háaleitisbrautar 66, en á efri hæð er safnaðarheimili Grensássóknar í eigu safnaðarins. Söfnuðurinn á rýmið sem er undir kirkjuskipinu auk kirkjunnar sjálfrar. Þar er Hjálparstarf kirkjunnar til húsa og Dagsetur. Þjóðkirkjan leigir þrjár skrifstofur á efri hæð fyrir sérþjónustupresta. Kirkjuþing hafa oft farið fram í safnaðarheimilinu, svo og kirkjuþing unga fólksins og aðrir fundir á vegum þjóðkirkjunnar. Aðgengi fatlaðra er tryggt, staðsetning miðsvæðis og samgöngur góðar. Óformlegar viðræður hafa verið við fulltrúa sóknarnefndar Grensássóknar um málið og er það allt saman til athugunar. Í fréttabréfi biskups, dags 6. maí sl., var farið yfir húsnæðismálin og kynnt að starfshópur hefði verið skipaður til að skoða málin frekar. Þar var jafnframt tekið fram að tillögum og ábendingum sem snúa að húsnæðismálum biskupsstofu yrði tekið fagnandi. Samhliða þessu hefur verið athugað hvort framleigja megi hluta þriðju hæðar Katrínartúns 4 eða jafnvel alla hæðina, þegar fyrir liggur hvar framtíðaraðsetur yfirstjórnar kirkjunnar verður. Skal þess getið að rætt hefur verið óformlega við Framkvæmdasýslu ríkisins um það hvort ríkið hefði áhuga á að taka hæðina á leigu, en ríkið hefur verið að koma sér fyrir á Höfðatorgi undanfarin ár. Einnig hefur verið rætt við aðila sem eru staðsettir í Katrínartúni 4, ef hugsanlegt væri að þeir hefðu áhuga á að stækka húsnæði sitt.