Sumartónar á Suðurnesjum

Hvalsneskirkja umvafin tónum himinsins - mynd: Drífa Hjartardóttir

Fyrir tæpu ári voru fyrstu sumartónleikarnir í Hvalsneskirkju og þeir tókust vel. Kirkjan.is sagði frá því hér.

Nú verður aftur farið af stað með sumartónleikaröð og fyrstu tónleikarnir verða í kvöld kl. 19.30 undir heitinu Hörputónar. Það er Elísabet Waage, hörpuleikari, sem slær hörpu sína af alkunnri snilld: Noktúrnur, tregaljóð og dillandi dansa.

Magnea Tómasdóttir er listrænn stjórnandi sumartónleikanna. Hún segir að tónleikarnir í fyrra hafi verið vel sóttir miðað við kórónuveirutíma. „Við eigum von á góðri aðsókn núna,“ segir hún „tónleikagestirnir koma víða að – bæði af Suðurnesjum og höfuðborgarsvæðinu enda er dagskráin vönduð og skemmtileg.“

Í sumar verða sem sé þrennir tónleikar: í júní, júlí og ágúst - þeir fyrstu í kvöld eins og áður sagði.

Feisbókarsíða sumartóna í Hvalsneskirkju.

Miðaverða er 2.500 kr. en ókeypis er inn fyrir 18 ára og  yngri.

Tónleikarnir eru styrktir af Uppbyggingarsjóði Suðunesja.

Tónleikahald í Hvalsneskirkju er nýlunda og hefur farið vel af stað. Kirkjan.is sagði til dæmis síðast frá föstutónleikum þar. Menningarstarfsemi á vel heima í kirkjum landsins. Kirkjurnar geyma mörg trúarleg listaverk og sögu lands og þjóðar. Það er andleg upplifun að sitja í kirkju og hlýða á listafólk flytja sígild tónverk. 

Nú er bara að skella sér suður með sjó í kvöld, svo í júlí og ágúst

hsh