Þrjár umsóknir bárust

Glerárkirkja á Akureyri -mynd sr. Sigurður Ægisson

Biskup Íslands óskaði nýlega eftir presti til þjónustu í Glerárprestakalli, Eyjafjarðar- og Þingeyjarprófastsdæmi.

Miðað var við að viðkomandi gæti hafið störf 1. janúar 2024.

Þrjár umsóknir bárust.

Ein er frá sr. Arnaldi Mána Finnssyni og tveir óska nafnleyndar.

Glerárprestakall er í sveitarfélaginu Akureyrarkaupstað.

Í prestakallinu er ein sókn, Lögmannshlíðarsókn.

Sóknin er á samstarfssvæði með Akureyrarsókn, sem myndar Akureyrarprestakall.

Í Glerárprestakalli eru tvær kirkjur, Glerárkirkja og Lögmannshlíðarkirkja.

Skrifstofuaðstaða sóknarprests og prests er í Glerárkirkju.

Vísað er til þarfagreiningar fyrir prestakallið varðandi frekari upplýsingar um starfið og starfsumhverfið.

Starfinu fylgja viðbótarskyldur við önnur prestaköll í prófastsdæminu, önnur prófastsdæmi, sem og við Þjóðkirkjuna og önnur kirkjuleg stjórnvöld.

Allar gildar umsóknir fara til valnefndar sem fer yfir allar umsóknir og boðar umsækjendur til viðtals innan þriggja vikna frá lokum umsóknarfrests starfsreglna um ráðningu í prestsstörf.

Valnefnd skal ná samstöðu um einn umsækjenda en valið skal byggt á fyrirliggjandi þarfagreiningu og rökstutt á grundvelli hennar.

Í framhaldinu ræður biskup viðkomandi í starfið, að því gefnu að hann telji niðurstöður valnefndar reistar á lögmætum sjónarmiðum.

Valnefnd áskilur sér rétt til að hafna öllum umsóknum.

slg