Sálmabók

1 Sú trú sem fjöllin flytur
oss fári þyngstu ver,
ei skaða skeyti bitur
þann skjöld ef berum vér,
í stormum lífs hún styður
og styrkir hjörtu þreytt,
í henni' er fólginn friður
sem fær ei heimur veitt.

2 Minn Jesú, lát ei linna
í lífi trú mér hjá
svo faldi fata þinna
ég fái þreifað á
og kraftinn megi kanna
sem kemur æ frá þér
til græðslu meinum manna
og mesta blessun lér.

3 Í trú mig styrk að stríða
og standast eins og ber,
í trú mig láttu líða
svo líki, Drottinn, þér.
Er dauðans broddur bitur
mér beiskri veldur þrá,
þá trú er fjöllin flytur
mig friða láttu þá.